استانالىق 16 جاستاعى ارسەن قاليەۆ Harvard Undergraduate Ventures-TECH جازعى باعدارلاماسىنا ءوتىپ، 3500 دوللار ستيپەنديا ۇتىپ الدى، دەپ حابارلايدى "ادىرنا" ۇلتتىق پورتالى digitalbusiness.kz-كە سىلتەمە جاساپ.
ارسەن باعدارلامالاۋعا 10 جاسىنان باستاپ قىزىعىپ، وزدىگىنەن جانە كۋرستار ارقىلى ءبىلىم العان. ول ەكى ءىت-جوبا جاساعان.
myCareAI — جاسوسپىرىمدەرگە پسيحولوگيالىق قولداۋ كورسەتەتىن Telegram-بوت جانە CardioAlertBot — جۇرەك-قان تامىرلارى اۋرۋلارىنىڭ قاۋپىن انىقتايتىن بوت.
بۇل جوبالار ارسەننىڭ جەكە قاجەتتىلىگىنەن تۋىنداعان. العاشقى بوت — وزىنە قاجەت بولسا، ەكىنشىسى — جۇرەك اقاۋى بار اجەسىنە باقىلاۋ جاساۋ بارىسىندا پايدا بولعان. بوتتار قاراپايىم ينتەرفەيسپەن جاسالعان جانە جاساندى ينتەللەكت پەن ماشينالىق وقىتۋ تەحنولوگيالارىنا نەگىزدەلگەن.
ارسەن سونداي-اق FizMat Mentors باعدارلاماسىن قۇرىپ، وندا رفمش تۇلەكتەرى مەكتەپ وقۋشىلارىنا شەتەلگە وقۋعا تۇسۋگە كومەكتەسەدى. بۇعان دەيىن ول فريلانسپەن تابىس تاۋىپ، تاپقان قارجىسىن ءوز جوبالارىنىڭ دامۋىنا سالعان.
بولاشاقتا ارسەن شەتەلدىك ۋنيۆەرسيتەتكە Computer Science ماماندىعى بويىنشا وقۋعا ءتۇسىپ، جاساندى ينتەللەكت پەن تسيفرلىق دەنساۋلىق ساقتاۋ سالاسىندا دامۋدى جوسپارلاپ وتىر. ول الەمدىك دەڭگەيدە اسەر ەتەتىن ستارتاپتار اشۋدى ارماندايدى.
