اقش بيلىگى وزبەكستان، قازاقستان جانە قىرعىزستاننان كەلگەن 131 ميگرانتتى ەلدەن دەپورتاتسيالادى، دەپ حابارلايدى "ادىرنا" ۇلتتىق پورتالى Fox News-كە سىلتەمە جاساپ.
نيۋ-يوركتەن ۇشقان ارنايى رەيس 30 ءساۋىر كۇنى تاشكەنتكە قوندى.
ميگرانتتار اقش-تا زاڭسىز تۇرىپ، ۆيزالىق رەجيمدى بۇزعان. ولار ەلدە بولۋ مەرزىمى ءوتىپ كەتكەننەن كەيىن انىقتالعان. دەپورتاتسيالانعاندار اراسىندا بىرنەشە قازاقستاندىق ازامات بار. قازاقستان مەن قىرعىزستان ازاماتتارى وزبەكستاننان ءوز ەلدەرىنە ءارى قاراي جول تارتاتىن بولادى.
وزبەكستان سىرتقى ىستەر مينيسترلىگى ءوز ازاماتتارىن قايتارۋ شىعىندارىن تولىقتاي ءوز موينىنا العانىن مالىمدەدى. بۇل قادام اقش پەن وزبەكستان اراسىنداعى العاشقى وسىنداي اۋقىمدى كەلىسىم بولىپ وتىر.
اقش ىشكى قاۋىپسىزدىك مينيسترلىگى بۇل دەپورتاتسيانى "تاريحي وپەراتسيا" دەپ اتادى. ۆەدومستۆو مالىمدەمەسىندە بۇل ارەكەت ترامپ اكىمشىلىگىنىڭ شەتەلدىك سەرىكتەستەرمەن زاڭسىز يمميگرانتتاردى ەلدەرىنە قايتارۋ بويىنشا جۇرگىزىپ جاتقان تابىستى ديپلوماتيالىق جۇمىس ۇلگىسى ەكەنى ايتىلعان.
ايتا كەتەيىك، قازاقستاننىڭ اقش-تاعى ەلشىلىگى بۇعان دەيىن زاڭسىز جۇرگەن قازاقستاندىقتاردى ءوز ەركىمەن ەلگە ورالۋعا شاقىرىپ، ولارعا جەڭىلدىكتەر قاراستىرىلاتىنىن حابارلاعان بولاتىن.
بۇعان قوسا، بيىل اقپاندا اقش-تا كوشى-قون زاڭىن بۇزدى دەگەن كۇدىكپەن بىرنەشە قازاقستاندىق ۇستالعان. كوستا-ريكا ترامپ اكىمشىلىگى تۇسىندا دەپورتاتسيالانعان العاشقى 200 ميگرانتتى قابىلداعان، ولاردىڭ اراسىندا ءۇش قازاقستاندىق بولعان.
ۇقساس جاڭالىقتار
