بۇگىن، 1 مامىر كۇنى قوستاناي قالاسىندا رەسپۋبليكالىق «بىرلىك جۇگىرىسى – 2025» جۇگىرىسى ءوتتى. بۇل جارىسقا مىڭداعان قاتىسۋشى – ەتنومادەني بىرلەستىكتەردىڭ وكىلدەرى، قازاقستان حالقى اسسامبلەياسىنىڭ مۇشەلەرى، وقۋشىلار، ستۋدەنتتەر، ش.قابىلباەۆ اتىنداعى ءىىم كۋرسانتتارى،سپورتشىلار، ارداگەرلەر مەن وبلىس تۇرعىندارى قاتىستى.
گاشەك كوشەسىندە تاڭەرتەڭگىلىك تىركەۋ مەن سالتاناتتى اشىلۋ راسىمىمەن باستالدى. مەملەكەتتىك گيمن ورىندالىپ، قوستاناي وبلىسى اكىمدىگى قوعامدىق دامۋ باسقارماسى باسشىسىنىڭ مىندەتىن اتقارۋشى دينارا قارىمساقوۆا قاتىسۋشىلارعا قۇتتىقتاۋ ءسوزىن ارنادى:
— بۇل جۇگىرىس – جاي عانا سپورتتىق شارا ەمەس. بۇگىن ءبىز ءبىر كومانداداي، ءبىر حالىقتاي، بەيبىتشىلىك، كەلىسىم مەن ءوزارا قۇرمەت جولىمەن بىرگە جۇگىرىپ كەلەمىز. بۇل، اسىرەسە، ءبىزدىڭ قوستاناي وبلىسىندا ەرەكشە ماڭىزعا يە، ويتكەنى مۇندا 50-دەن استام ەتنوس وكىلدەرى تاتۋلىق پەن دوستىقتا ءومىر سۇرۋدە. وسى – ءبىزدىڭ ءوڭىردىڭ كۇشى، حالقىمىزدىڭ قۋاتى! اسسامبلەيا ءۇش ونجىلدىق بويى بىرلىك پەن كەلىسىمدى نىعايتۋعا زور ۇلەس قوسىپ كەلەدى، ال بۇگىنگى جۇگىرۋ – سونىڭ جارقىن دالەلى. مۇندا ءتۇرلى ەتنومادەني بىرلەستىكتەردىڭ وكىلدەرى، جاستار، سپورتشىلار مەن
قالا تۇرعىندارى جينالدى – بارشامىزدى بىرىكتىرەتىن ورتاق سەزىم: وتانعا دەگەن ماحاببات، ءبىر-بىرىمىزگە دەگەن قۇرمەت پەن بىرلىككە دەگەن ۇمتىلىس.
قۇتتىقتاۋعا قحا ارداگەرى كالقامان جاقىپ قوسىلدى، ال جەڭىل اتلەتيكادان تورەشى، قوسىمشا ءبىلىم بەرۋ پەداگوگى قۇرماناي يسەرگەپوۆ باعدارلاما تۋرالى تولىق اقپارات بەردى.
جۇگىرۋ بىرنەشە قاشىقتىقتى قامتىدى: ينكليۋزيۆتى سپورتشىلار ءۇشىن 0,5 كم، ءار جاستاعى بالالار ءۇشىن 1,1 كم جانە 16 جاستان اسقاندار ءۇشىن 8 كم. ءاربىر ستارتتى جانكۇيەرلەردىڭ قوشەمەتى مەن قالا تۇرعىندارىنىڭ قىزۋ قولداۋى سۇيەمەلدەدى.
ايتا كەتەيىك، «بىرلىك جۇگىرىسى» تەك وبلىس ورتالىعىندا عانا ەمەس، سونداي-اق ءوڭىردىڭ قالالارى مەن اۋداندارىندا دا ءوتتى. ءاربىر ەلدى مەكەندە تۇرعىندار قاشىقتىققا شىعىپ، وزدەرىنىڭ ىنتىماقتاستىعىن ءبىلدىرىپ، سالاۋاتتى ءومىر سالتىن قولداپ، قازاقستاندىق قوعامنىڭ اۋىزبىرشىلىگىن كورسەتتى. كەڭ كولەمدە ۇيىمداستىرىلعان بۇل شارا شىن مانىندە وڭىرلىك سپورت مەرەكەسىنە اينالدى.
ۇيىمداستىرۋشىلار مۇنداي ءىس-شارالار بىرلىكتى نىعايتىپ، جاڭا جەتىستىكتەرگە شابىت بەرەتىنىن جانە ءوڭىر ءۇشىن يگى داستۇرگە اينالاتىنىنا سەنىم ءبىلدىردى.
ۇقساس جاڭالىقتار
