اقمولا وبلىسىندا 9 مىڭ بالا تەگىن شىعارماشىلىق ۇيىرمەلەرگە قاتىسادى

2025 جىلى اقمولا وبلىسىندا بالالاردى شىعارماشىلىق باعىتتاعى تەگىن ۇيىرمەلەرگە تارتۋعا ارنالعان مەملەكەتتىك تاپسىرىستى جۇزەگە اسىرۋ جالعاسادى. بۇل باستاما وڭىردەگى 9 مىڭعا جۋىق بالانىڭ ونەرگە ەركىن قادام باسۋىنا جانە قابىلەتتەرىن دامىتۋىنا مۇمكىندىك بەرەدى. باعدارلاما 2020 جىلعى 1 قىركۇيەكتە مەملەكەت باسشىسىنىڭ بۇقارالىق بالالار شىعارماشىلىعىن دامىتۋ جانە «بالالار كلۋبتارىنىڭ» قىزمەتىن قايتا جانداندىرۋ جونىندەگى تاپسىرماسىنا سايكەس جۇزەگە اسىرىلۋدا. وبلىستىق مادەنيەت باسقارماسىنىڭ مالىمەتىنشە، وسى باعىتتاعى جۇمىستارعا بيىل وبلىستىق بيۋدجەتتەن 1,3 ملرد تەڭگە بولىنگەن. مامىر ايىنىڭ وزىندە 362 ملن تەڭگە يگەرىلگەن. ۇيىرمەلەردى ۇيىمداستىرۋمەن 69 قىزمەت جەتكىزۋشى اينالىسادى. قازىرگى تاڭدا وڭىردە 277 ۇيىرمە جۇمىس ىستەيدى، وعان 8,5 مىڭنان استام بالا قاتىسۋدا. ۇيىرمەلەر اقمولا وبلىسىنىڭ بارلىق اۋدان، قالالارىندا اشىلعان. ەڭ تانىمال باعىتتاردىڭ قاتارىندا بەينەلەۋ ونەرى، ۆوكال، حورەوگرافيا، مۋزىكالىق اسپاپتاردا ويناۋ، تەاتر ونەرى مەن قولدانبالى شىعارماشىلىق بار. شىعارماشىلىق توپتارعا  قاتىساتىن بالالار وبلىستىق، رەسپۋبليكالىق جانە حالىقارالىق بايقاۋلارعا بەلسەندى قاتىسىپ، جۇلدەلى ورىندارعا يە بولۋدا. 2025 جىلى «انترە&رادۋگا»، «Adagio» سەكىلدى شىعارماشىلىق ستۋديالار شىمكەنت قالاسىنداعى حالىقارالىق BI STYLE بايقاۋىنا جانە ارقالىقتاعى رەسپۋبليكالىق «بالالار اماناتى» كونكۋرسىنا قاتىستى. سونىمەن قاتار، «شاپاعات» جەكە كاسىپكەرلىگى جانىنداعى بي ۇجىمدارى Mega Snow, World of Talent, Gulnar Fest حالىقارالىق بايقاۋلارىندا جۇلدەلى ورىندار يەلەنسە، «مارعۇلان» ۇجىمى Turkestan Music Festival جەڭىسىنەن كەيىن دۋبايدا وتكەن حالىقارالىق فەستيۆالگە شاقىرتۋ الدى. «سامەكە» ستۋدياسىنىڭ بالالارى ءباا-دە وتكەن NURLY FEST DUBAI فەستيۆالىندە ءبىرىنشى ورىن مەن گران-ءپريدى جەڭىپ الدى. وڭىردە جاڭا باعىتتاردى دامىتۋعا دا ەرەكشە نازار اۋدارىلىپ وتىر. مىسالى، جەكە كاسىپكەر دانياروۆا بالالاردى زاماناۋي سۋرەت سالۋ تەحنيكاسىنا ۇيرەتسە، قوسشى قالاسىنداعى «ونەر» جاس دارىندار اكادەمياسىندا توقىما، مونشاقپەن جۇمىس، كيىم ۇلگىلەۋ جانە تىگۋ باعىتتارى قامتىلعان. اقمولالىق شىعارماشىلىق ۇجىمدار مۇمكىندىگى شەكتەۋلى بالالار مەن ارداگەرلەرگە ارنالعان قايىرىمدىلىق كونتسەرتتەرگە دە بەلسەندى قاتىسادى. بۇل باستاما بالالاردىڭ عانا ەمەس، قوعامنىڭ رۋحاني دامۋىنا ىقپال ەتىپ وتىر.