ۆاتيكاندا جاڭا پاپانى سايلاۋ ءراسىمى باستالادى

7 مامىردا ۆاتيكاندا جاڭا ريم پاپاسىن سايلاۋ ءۇشىن جابىق شىركەۋ سايلاۋى وتەدى، دەپ حابارلايدى “ادىرنا” ۇلتتىق پورتالى Catholic News Agency-گە سىلتەمە جاساپ. قازىرگى ساتتە اۋليە پەتر شىركەۋىندە سالتاناتتى مەسسا ءوتىپ جاتىر. باسىلىمىنىڭ جازۋىنشا، كاتوليكتەر بۇكىل الەم بويىنشا دۇعا جاساپ، كاردينالدارعا – جاڭا پاپانى سايلاۋ سياقتى تاريحي جاۋاپكەرشىلىك جۇكتەلگەن جاندارعا، ەرەكشە نيەتپەن ءمىناجات ەتۋدە. استانا ۋاقىتى بويىنشا ساعات 18:45-تە كاردينالدار اۋليە مارفا ۇيىنەن شىعىپ، سيكستين كاپەللاسىنا جينالادى. بۇل – كونكلاۆتىڭ رەسمي باستالۋى بولادى. كونكلاۆقا 133 كاردينال قاتىسادى. جينالىس جابىق فورماتتا جانە قاتاڭ قۇپيا جاعدايدا وتەدى. باسىلىمنىڭ مالىمەتىنشە، كونكلاۆ بارىسىندا كاردينالدار سىرتقى الەمنەن ايتارلىقتاي وقشاۋلانادى. بەيسەنبىدەن باستاپ كاردينال-سايلاۋشىلاردىڭ كۇن تارتىبىنە تاڭعى مەسسا مەن پاۋىل III كاپەللاسىنداعى ليتۋرگيا، كەيىن كۇندىزگى ليتۋرگيا ەنگىزىلگەن. وسى راسىمدەردەن كەيىن داۋىس بەرۋ وتەدى. وسى كۇندەرى الەم نازارى سيكستين كاپەللاسىنىڭ توبەسىنە ورناتىلعان مۇرجاعا اۋادى. استانا ۋاقىتى بويىنشا شامامەن ساعات 15:00 مەن 22:00-دە مۇرجادان ءتۇتىن شىعادى. ەگەر اق ءتۇتىن كوتەرىلسە، بۇل جاڭا ريم پاپاسىنىڭ سايلانعانىن بىلدىرەدى.