الماتى وبلىسى، تالعار اۋدانىنا قاراستى قارابۇلاق اۋىلىندا اتىس بولعانى تۋرالى اقپارات تارادى، دەپ حابارلايدى “ادىرنا” ۇلتتىق پورتالى Alash.KZ- كە سىلتەپ.
وقيعا 8 مامىر كۇنى بولعان. الەۋمەتتىك جەلىلەردە جاريالانعان دەرەكتەردى الماتى وبلىستىق پوليتسيا دەپارتامەنتى راستادى. قازىرگى تاڭدا اتالعان دەرەك بويىنشا سوتقا دەيىنگى تەرگەۋ باستالعان.
“قابىلدانعان شارالاردىڭ ناتيجەسىندە اتىسقا قاتىسى بار بارلىق تۇلعالار انىقتالدى. ءتورت كۇدىكتى اۋرۋحاناعا جاتقىزىلىپ، كۇزەتپەن قامتىلدى. تاعى ءبىر كۇدىكتى ۋاقىتشا ۇستاۋ يزولياتورىنا قاماۋعا الىندى”، — دەپ مالىمدەدى ۆەدومستۆودان.
سونداي-اق، پوليتسيا تەرگەۋ اياسىندا جەدەل-ىزدەستىرۋ شارالارىن جالعاستىرىپ جاتقانىن حابارلادى.
“وقيعانىڭ بارلىق ءمان-جايىن جان-جاقتى جانە وبەكتيۆتى انىقتاۋعا باعىتتالعان شارالار قولعا الىندى. بارلىق كىنالىلەر زاڭ اياسىندا جاۋاپقا تارتىلادى.
اتالعان وقيعانىڭ ۇيلەنۋ تويىندا بولعانى تۋرالى اقپارات شىندىققا جاناسپايدى. تەرگەۋ مۇددەسىنە بايلانىستى باسقا مالىمەتتەر جاريا ەتىلمەيدى، — دەلىنگەن پوليتسيا تاراتقان رەسمي حابارلامادا.
ۇقساس جاڭالىقتار
