«اۋىل – ەل بەسىگى»: اقمولا وبلىسىندا اۋىلداردى دامىتۋ قارقىندى ءجۇرىپ جاتىر

اقمولا وبلىسىندا «اۋىل – ەل بەسىگى» جوباسى اياسىندا اۋىلدىق اۋماقتاردى دامىتۋ باعىتىنداعى اۋقىمدى جۇمىستار جالعاسىپ جاتىر. 2019 جىلى مەملەكەتتىك وڭىرلەردى دامىتۋ باعدارلاماسىنىڭ ءبىر بولىگى رەتىندە باستالعان بۇل باستاما بۇگىندە جاڭا فورماتتا – 2027 جىلعا دەيىنگى اۋىلدىق اۋماقتاردى دامىتۋ تۇجىرىمداماسى رەتىندە جۇزەگە اسىرىلۋدا. جوبانىڭ نەگىزگى ماقساتى – بولاشاعى بار اۋىلداردى باسىم باعىت رەتىندە دامىتىپ، ينفراقۇرىلىمدى جاڭعىرتۋ جانە اۋىلداعى ءومىر ءسۇرۋ دەڭگەيىن وڭىرلىك ستاندارتتارعا ساي ەتۋ. التى جىل ىشىندە وبلىستا جالپى قۇنى 59,6 ميلليارد تەڭگەنى قۇرايتىن 387 جوبا جۇزەگە اسىرىلدى. سونىڭ اياسىندا 57 ءبىلىم بەرۋ، دەنساۋلىق ساقتاۋ، مادەنيەت جانە سپورت نىسانى سالىندى جانە قايتا جوندەلدى. سونىمەن قاتار، 330 الەۋمەتتىك نىسان مەن اۋىلىشىلىك جولدار جاڭارتىلدى. اتالعان شارالار 142 اۋىلدىق ەلدى مەكەندەگى 277 مىڭنان استام تۇرعىننىڭ تۇرمىس ساپاسىن جاقسارتۋعا وڭ اسەر ەتتى. سونىمەن قاتار، 1,6 مىڭنان استام جاڭا جۇمىس ورنى اشىلدى. وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى الماگۇل شۇگۋرماكوۆانىڭ ايتۋىنشا، «بۇل جوبا اۋىلدى جۇيەلى تۇردە دامىتۋعا سەرپىن بەرىپ، حالىق ءۇشىن جاڭا مۇمكىندىكتەر اشۋدا جانە الەۋمەتتىك، ينجەنەرلىك ينفراقۇرىلىمنىڭ تۇراقتى دامۋىنا جول اشىپ وتىر». بيىل دا جۇمىس جالعاسۋدا. بۇرىن جاسالعان كەلىسىمشارتتار اياسىندا تاعى 37 جوبانى اياقتاۋ جوسپارلانعان. قارجىنى ءتيىمدى يگەرۋ باعىتىندا دا جوسپارلى جۇمىس ءجۇرىپ جاتىر: اۋىلدىق وكرۋگتەردە جوسپارلانعان ءىس-شارالاردى ىسكە اسىرۋعا 18 ميلليارد تەڭگەدەن استام قاراجات باعىتتالدى. اۋىلدىق اۋماقتاردى دامىتۋداعى ماڭىزدى باعىتتاردىڭ ءبىرى – ەكى مەملەكەتتىك باستامانى، ياعني «اۋىل – ەل بەسىگى» مەن «اۋىل اماناتى» باعدارلامالارىن بىرىكتىرۋ. بۇل سينەرگيا اۋىل كاسىپكەرلىگىن قولداۋدى كۇشەيتىپ، نارىق پەن كولىك-لوگيستيكالىق ينفراقۇرىلىمعا قولجەتىمدىلىكتى كەڭەيتەدى، سونداي-اق جەرگىلىكتى جەرلەردەگى وزەكتى ماسەلەلەردى جەدەل شەشۋگە مۇمكىندىك بەرەدى دەپ كۇتىلۋدە. اۋىل – مەملەكەت نازارىنداعى باستى باسىمدىقتاردىڭ ءبىرى. اقمولا وبلىسى اۋىل تۇرعىندارىنىڭ ءومىر ءسۇرۋ ساپاسىن ارتتىرىپ، اۋىلداردى تارتىمدى ءارى جايلى ەتۋ جولىندا نىق قادامدار جاساپ كەلەدى.