كوكشەتاۋ قالاسىندا «حالىق قاتىساتىن بيۋدجەت» باعدارلاماسى شەڭبەرىندە بيىل 30 جوبا ىسكە اسپاق. بۇل باستاما تۇرعىنداردىڭ ءوز اۋماعىن كوركەيتۋگە تىكەلەي اتسالىسۋىنا مۇمكىندىك بەرەدى. جوبالارعا ءوتىنىم قابىلداۋ قالا اكىمدىگىنىڭ رەسمي سايتى ارقىلى جۇزەگە اسىرىلدى. قالا تۇرعىندارى اۋلالار مەن قوعامدىق كەڭىستىكتەردى اباتتاندىرۋ جونىندە ءوز ۇسىنىستارىن ءبىلدىردى.
2025 جىلعى 20 قاڭتار مەن 1 ناۋرىز ارالىعىندا بارلىعى 119 ءوتىنىم كەلىپ ءتۇستى. ءار تۇرعىن تەك ءبىر جوباعا عانا داۋىس بەرە الدى. جوبا قارالۋى ءۇشىن كەمىندە 100 داۋىس جيناۋى ءتيىس بولاتىن.
اكىم كەڭەسشىسى ماحاببات سامراتتىڭ ايتۋىنشا، بارلىق ۇسىنىستار الدىن الا بەلگىلەنگەن تالاپتارعا ساي بولۋى قاجەت ەدى.
“ساراپتامالىق كەڭەسكە قالالىق ءماسليحات دەپۋتاتتارى مەن قوعام بەلسەندىلەرى كىردى. ولار كەلىپ تۇسكەن 119 ءوتىنىمدى قاراپ شىقتى. ناتيجەسىندە 92-ءسى داۋىس بەرۋگە جىبەرىلدى. ال قالعان 27 ءوتىنىم بەلگىلەنگەن كريتەريلەرگە ساي بولماعان نەمەسە بوس جەر تەلىمى بولماعاندىقتان قابىلدانبادى”، – دەدى ول.
داۋىس بەرۋ ناتيجەسىندە 92 جوبانىڭ 71-ءى قاجەتتى 100 داۋىستان جوعارى جينادى. الايدا بارلىعى بىردەن جۇزەگە اسپايدى.
“بيىلعى جىلى «حالىق قاتىساتىن بيۋدجەت» باعدارلاماسىنا 550 ميلليون تەڭگە ءبولىندى. بۇل قالانىڭ جالپى بيۋدجەتتىك شىعىندارىنىڭ كەمىندە 10 پايىزى. قارجىلىق مۇمكىندىكتەرگە بايلانىستى 71 جوبانىڭ ىشىنەن 30-ى عانا ىرىكتەلىپ، بيىل جۇزەگە اسادى. قالعان جوبالار 2026 جىلى كەزەڭ-كەزەڭىمەن ورىندالادى”، دەپ اتاپ ءوتتى ماحاببات سامرات.
ايتا كەتەيىك، وتكەن جىلى وسى باعدارلاما اياسىندا كوكشەتاۋ قالاسىندا 19 جوبا جۇزەگە اسقان. سونىڭ ىشىندە 12 بالالار ويىن الاڭى مەن 7 سپورتتىق الاڭ سالىنعان.
باعدارلامانىڭ باستى ماقساتى تۇرعىنداردىڭ ءوز ءومىر ءسۇرۋ ورتاسىن جاقسارتۋعا بەلسەندى قاتىسۋىنا مۇمكىندىك بەرۋ جانە جەرگىلىكتى بيلىك پەن حالىق اراسىنداعى بايلانىستى كۇشەيتۋ.
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز