"استانا تەمىرلاننىڭ باعىن اشتى"

انالار مەيرامى اياسىندا بولاشاعىنان زور ءۇمىت كۇتتىرەتىن سپورتشىنىڭ ارتىندا تۇرعان اسىل جان – اناسىنا قۇرمەت رەتىندە تومەندەگى سۇحباتتى نازارلارىڭىزعا ۇسىنامىز. قيىندىق پەن قۋانىش قاتار جۇرەتىن سپورت جولىندا بالاسىنا تىرەك بولا بىلگەن، ونىڭ ءار جەڭىسىن جۇرەگىمەن بىرگە وتكەرگەن ارداقتى انا – ارداق ىسقاقوۆا. ول – 22 جاسقا دەيىنگى بوكسشىلار اراسىندا ازيا چەمپيونى اتانعان تەمىرلان مۇقاتاەۆتىڭ اناسى. "ادىرنا" ۇلتتىق پورتالى بولاشاعىنان زور ءۇمىت كۇتتىرەتىن بوكسشنىڭ اناسىمەن اڭگىمەلەسىپ، تەمىرلاننىڭ بالالىق شاعى تۋرالى سۇحبات قۇردى. – قازىرگى تاڭدا تەمىرلان بوكستا اۋىز تولتىرىپ ايتارلىقتاي ناتيجەگە قول جەتكىزدى. بالاڭىزدى قانشا جاسىنان باستاپ بوكسقا بەردىڭىز؟ – تەمىرلان وتە تەنتەك، بۇزىق بولعان سوڭ 8 جاسىنان باستاپ «تولقىن» سپورت كەشەنىندەگى بوكس بلومىنە بەردىم. نەگىزى بالام 2004 جىلى سەمەي قالاسىندا دۇنيەگە كەلگەن. مەن سەمەيدىڭ اباي اۋدانىنىڭ قىزى بولسام، كۇيەۋىم جارما اۋدانىنىڭ ازاماتى. اكەم اۋدانعا بەلگىلى بالۋان بولسا، كۇيەۋىم بوكسقا قاتىسىپ، كەيىن امالسىز تاستاپ كەتەدى. ءوزىنىڭ ورىندالماي قالعان ارمانىن قازىر بالاسى جالعاستىرىپ جاتىر. تەمىرلان وتە زەرەك بولىپ، بىلىمگە قۇمار بولىپ ءوستى. سونداي-اق كوشەگە شىقسا كۇشى تاسىپ توبەلەسىپ كەلەتىن بالا بولدى. وسكەننەن كەيىن ءتارتىبىن رەتتەيىك دەپ سپورتقا بەردىك. مەكتەپتىڭ 6-7 سىنىبىندا وقىپ جۇرگەندە بىرنەشە دۇركىن قازاقستان چەمپيونى بولدى. بالامىزدىڭ ناتيجەسى كوتەرىلگەننەن كەيىن «قازاق تەحنولوگيا جانە بيزنەس ۋنيۆەرسيتەتىنىڭ» جانىنداعى كوللەدجدىڭ سپورت فاكۋلتەتىنە ءتۇستى. ودان كەيىن تەمىرلان جاسوسىپىرىمدەر جانە جاستار اراسىندا بىرنەشە دۇركىن قازاقستان چەمپيونى بولدى. سونداي-اق ول جاستار اراسىندا دۋبايدا وتكەن ازيا چەمپيوناتىنا قاتىسىپ، وندا ءبىرىنشى ورىن الىپ كەلدى. وسى جەڭىسىنەن كەيىن قازاق تەحنولوگيايا جانە بيزنەس ۋنيۆەرسيتەتىنىڭ باسشىلىعى گرانتقا ءتۇسىرىپ، كوللەدجدەن كەيىن الىپ قالدى. قازىرگى تاڭدا بالام ەرلەر اراسىندا قازاقستاننىڭ ەكى دۇركىن چەمپيونى، ءۇش دۇركىن ازيا چەمپيونى جانە 22 جاسقا دەيىن ازيا چەمپيونى بولدى. 2004 جىلدىڭ تامىز ايىندا افينادا وليمپيادا ويىندارى ءوتتى. ال مەن تەمىرلاندى اقپان ايىندا بوسانىپ، جۇمىس بارىسىمەن سەمەي قالاسىنان استاناعا كوشىپ كەلگەن ەدىك. مەن دە جانە جولداسىم دا بوكستى قاتتى جاقسى كورىپ، وليمپيادا ويىندارىن تاعاتسىزدانا كۇتەمىز. بىراق 2004 جىلعى وليمپيادا دا بوكسشىلارىمىز مەدال الماي، زارىعىپ كۇتىپ ءجۇرمىز. افينا وليمپياداسىنىڭ سوڭعى كۇندەردىڭ بىرىندە باقتيار ارتاەۆ باۋىرىمىز التىن مەدالدى جۇلىپ الادى عوي. ول كەزدە جاتاحانادا تۇرامىز. ەمىزۋلى تەمىرلانىمدى الىپ، قازاق پا، ورىس پا، وعان قاراماي ءار ءۇيدىڭ ەسىگىن قاعىپ «قازاقتار التىن مەدال الدى. ۋرا!» دەپ ءسۇيىنشى سۇرادىم. ءبىر اجەمىزدىڭ ۇيىنە بارىپ «باقتيار ارتاەۆ جەڭدى» دەپ جىلاپ تۇرسام «ويباي قىزىم نە بولدى؟ سونشا ايعايلاعانىڭ نە؟ جارايدى ەندى، مىنا ۇلىڭا باتامدى بەرەيىن. قولىڭداعى بالا باقتيار ارتاەۆتاي چەمپيون بولسىن» دەپ باتاسىن بەرىپ جىبەردى. كەيدە سول كىسىنىڭ باتاسى قابىل بولىپ، پەرىشتەلەر «ءاۋمين» دەدى مە دەپ ويلايمىن. – بالاڭىزدىڭ الدىنا قويعان ماقساتى قانداي؟ – بولاشاقتا بالام باقتيار اعاسى سەكىلدى الەم جانە وليمپيادا چەمپيونى بولىپ جاستا، نۇر ۇستىنە نۇر بولار ەدى.  قازىر تەمىرلان 21 جاسقا تولدى. 19 جاسىندا ەرەكسەكتەر اراسىنداعى قازاقستاننىڭ بوكستان ۇلتتىق قۇراماسىنا كىردىك. قازاقستان بوكس فەدەراتسياسىنىڭ پرەزيدەنتى شاحمۇرات ءمۇتالىپ پەن كەڭەس راقىشەۆ جانە ۇلتتىق قۇرامانىڭ باس باپكەرى قايرات ساتجانوۆقا مىڭدا ءبىر راحمەت. قازىرگى تاڭدا بالام تۇركىستان قالاسىندا ويىن-جاتتىعۋ جۇمىستارىندا ءجۇر. اللا ءساتىن سالسا كۇزدە وتەتىن الەم چەمپيوناتىنا قاتىسىپ، ابىرويلى بولىپ كەلەدى دەپ سەنەمىن. بارعان جەرىنەن مەدالسىز قايتپاعان بالا عوي. – ادەتتە انالار بالاسىنىڭ بوكسقا بەرگىسى كەلمەيدى عوي. ءسىز بالاڭىزدى بوكسقا بەرۋدەن قورىقپادىڭىز با؟ – جوق، قورىقپادىم. باقتيار ارتاەۆ، گەنادي گولوۆكين، سەرىك ساپيەۆ، باقىت سارسەكباەۆ سەكىلدى بوكسشىلاردى ۇلگى تۇتىپ، سولار سەكىلدى ازامات بولسا دەپ ارماندادىم. «داۋلەت» سپورت كەشەنىندە اكەسى كۇزەتشى بولىپ جۇمىس ىستەگەننەن كەيىن تەمىرلان ەلىمىزگە اتى بەلگىلى بوكسشىلارمەن سۋرەتكە ءتۇسىپ كەلەدى. اكە-شەشە رەتىندە اتاقتى سپورتشىلارمەن سۋرەتكە تۇسكەنىن ىرىمداپ «اعالارىڭنىڭ جولىن بەرسە ەكەن» دەپ ىرىمدايتىنبىز. – ءسوز باسىنا «سەمەيدەن استاناعا كوشىپ كەلدىك» دەپ ايتىپ جاتىرسىز عوي. ەلورداعا كوشىپ كەلۋىڭىز بالاڭىزدىڭ جەتىستىككە جەتۋىنە قانشالىقتى ىقپال ەتتى؟ – وتباسىمىزبەن استاناعا كوشىپ كەلۋىمىز تەمىرلاننىڭ جانە وزگە بالالارىمنىڭ باعىن اشتى. ەلوردادا تۇرىپ جاتقانىمىزعا 20 جىلدان استى. استانادا ءوسىپ-ءونىپ بەس بالانى اياقتان تۇرعىزدىق. تەمىرلاننىڭ بەكسۇلتان دەگەن باۋىرى «اعامنىڭ جولىن قۋامىن» دەپ بوكستا ءجۇر. استانا قالاسىنىڭ دەنە شىنىقتىرۋ جانە سپورت باسقارماسىنا مىڭدا ءبىر راحمەت. تەمىرلان سەكىلدى بالالار سپورتتاعى قامقورلىقتىڭ ارقاسىندا اۋىز تولتىرىپ ايتارلىقتاي ناتيجەگە جەتتى. ءبىر سوزبەن ايتقاندا استانا تەمىرلاننىڭ باعىن اشتى. بارشا انالاردى وسى كەرەمەت كوكتەم مەرەكەسى – انالار كۇنىمەن شىن جۇرەكتەن قۇتتىقتايمىن! انا – ءاربىر وتباسىنىڭ، ءاربىر ەلدىڭ جۇرەگى. بالا ءۇشىن وتقا دا، سۋعا دا تۇسەتىن انالاردىڭ جۇرەگى مەيىرىم مەن ۇمىتكە تولى. ءبىز – انالار، بالامىزدىڭ ءاربىر تابىسىنا قۋانىپ، ءاربىر قادامىنا دەمەۋ بولۋعا تىرىسامىز. بالالارىمىز امان بولىپ، ارماندارىنا جەتسىن. ءاربىر انا بالاسىنىڭ جەتىستىگىنە ماقتانا الاتىن باقىتتى عۇمىر كەشسىن! - جاۋابىڭىزعا راقمەت!