استانادا بەلسەندى ەرمەك نارىمباي سوت شەشىمىن ورىنداماعانى ءۇشىن بەس تاۋلىككە اكىمشىلىك قاماۋعا الىندى، دەپ حابارلايدى "ادىرنا" ۇلتتىق پورتالى قازتاگ-قا سىلتەمە جاساپ.
«وسىنداي ارەكەتتەردىڭ قايتالانباۋىن قامتاماسىز ەتۋ، الەۋمەتتىك ادىلەتتىلىكتى قالپىنا كەلتىرۋ جانە قۇقىقبۇزۋشىلىق جاساعان ادامدى تاربيەلەۋ، سونداي-اق بۇل قۇقىقبۇزۋشىلىقتىڭ كەلەشەكتە نارىمبايدىڭ ءوزى جانە وزگە ادامدار تاراپىنان قايتالانۋىن الدىن الۋ ماقساتىندا سوت نارىمباي ە.ە.-ءنى بەس تاۋلىك مەرزىمگە اكىمشىلىك قاماۋعا الۋدى دۇرىس دەپ ەسەپتەيدى»، – دەلىنگەن سوت قاۋلىسىندا.
قازاقستان رەسپۋبليكاسىنىڭ اكىمشىلىك قۇقىقبۇزۋشىلىق تۋرالى كودەكسىنىڭ 669-بابىنىڭ 1-بولىگىنە سايكەس، بۇل باپ بويىنشا ايىپپۇل نەمەسە بەس تاۋلىككە دەيىن اكىمشىلىك قاماۋ كوزدەلگەن.
پوليتسيا قىزمەتكەرى جاساعان اكىمشىلىك قۇقىقبۇزۋشىلىق تۋرالى حاتتامادا كورسەتىلگەندەي، ەرمەك نارىمباي 2025 جىلدىڭ 20 ناۋرىزى مەن 21 ءساۋىرى ارالىعىندا Facebook الەۋمەتتىك جەلىسىندە الەۋمەتتىك-ەكونوميكالىق جانە قوعامدىق-ساياسي تاقىرىپتاردا 10 جاريالانىم سالعان.
سوتتا نارىمباي ءوزىن بۇرىن سوتتاعان باپقا وزگەرىستەر ەنگىزىلگەنىن ايتىپ، ەندى ول باپ نەگىزىندە قۇقىقتارىن شەكتەۋگە بولمايتىنىن مالىمدەدى جانە بۇل ماسەلەنى كونستيتۋتسيالىق سوتقا جولداۋدى سۇرادى. الايدا، سۋديا ونىڭ بۇل ءوتىنىشىن قاناعاتتاندىرمادى.
سوتتىڭ شەشىمىندە 2023 جىلدىڭ 19 قىركۇيەگىندە الماتى وبلىسى، قوناەۆ قالاسىنىڭ سوتى نارىمبايدى قوعامدىق قىزمەتپەن اينالىسۋ قۇقىعىنان ايىرعانى جانە وعان الەۋمەتتىك-ەكونوميكالىق، قوعامدىق-ساياسي تاقىرىپتاردا جاريالانىم جاساۋعا، ەفيرگە شىعۋعا، باق پەن الەۋمەتتىك جەلىلەردە نەمەسە وزگە دە تەلەكوممۋنيكاتسيا جەلىلەرىندە ماتەريال تاراتۋدى تىيىم سالعانى اتاپ وتىلگەن.
