ۋكراينا پرەزيدەنتى ۆلاديمير زەلەنسكي ۆلاديمير پۋتينمەن كەلىسسوزدەر جۇرگىزۋگە كەلىستى. ول الەۋمەتتىك جەلىدەگى پاراقشاسىندا رەسەي باسشىسىن 15 مامىر كۇنى تۇركيادا كۇتەتىنىن جەتكىزدى، دەپ حابارلايدى «ادىرنا» ءتىلشىسى.
سونداي-اق زەلەنسكي كيەۆ ماسكەۋدەن 12 مامىردان باستاپ اتىستى تولىعىمەن توقتاتۋدى كۇتەتىنىن ايتتى.
«تولىق جانە ۇزاق مەرزىمدى، ديپلوماتياعا قاجەت نەگىزدى قامتاماسىز ەتۋ ءۇشىن رەسەيدىڭ اتىستى توقتاتۋىن كۇتەمىز. ادام ءولتىرۋدى ۇزارتۋدىڭ ەش ءمانى جوق. ال مەن ءپۋتيندى جەكە ءوزىم بەيسەنبى كۇنى تۇركيادا كۇتەمىن»،—دەدى ول.
ەسكە سالايىق، 11 مامىرعا قاراعان ءتۇنى ۆلاديمير پۋتين كرەملدە سويلەگەن سوزىندە ۋكرايناعا تىكەلەي كەلىسسوزدەردى قايتا باستاۋعا ۇسىنىس جاساعان بولاتىن. رەسەي باسشىسى بۇل مالىمدەمەدەن كەيىن تۇركيا پرەزيدەنتى رەجەپ تايىپ ەردوعانمەن تەلەفون ارقىلى سويلەستى. اڭگىمە بارىسىندا ەردوعان تۇركيانىڭ رەسەي مەن ۋكراينا اراسىنداعى كەلىسسوزدەردى ۇيىمداستىرۋعا قاتىسۋعا دايىن ەكەنىن مالىمدەدى.
