اقمولا وبلىسىندا 2024–2025 جىلدارداعى جىلۋ بەرۋ ماۋسىمى ءوز مارەسىنە جەتتى. وبلىستىق توتەنشە جاعدايلار دەپارتامەنتىنىڭ مالىمەتىنشە، ەسەپتى كەزەڭدە ءورت سانى مەن كەلتىرىلگەن ماتەريالدىق شىعىن كولەمى ازايعان. الايدا حالىق، اسىرەسە بالالار اراسىنداعى قازا مەن جاراقات الۋ فاكتىلەرى ءالى دە الاڭداتارلىق دەڭگەيدە قالىپ وتىر.
وتكەن ماۋسىمدا وڭىردە بارلىعى 328 ءورت تىركەلگەن. بۇل الدىڭعى جىلمەن سالىستىرعاندا ازداپ تومەن كورسەتكىش. وكىنىشكە قاراي، ءورت سالدارىنان 16 ادام، سونىڭ ىشىندە 5 بالا قازا تاپتى. تاعى 5 ادام جاراقات العان، ونىڭ ەكەۋى – بالالار. قاۋىپ-قاتەرگە قاراماستان، قۇتقارۋشىلاردىڭ كاسىبي ارەكەتىنىڭ ارقاسىندا 10 ادام امان قالدى. دەگەنمەن، كامەلەتكە تولماعانداردىڭ ءولىمى ەرەكشە الاڭداۋشىلىق تۋعىزىپ وتىر.
ءورتتىڭ باستى سەبەپتەرى – پەشتەر مەن ەلەكتر جابدىقتارىن دۇرىس پايدالانباۋ. ورتتەردىڭ جارتىسىنان استامى جەكە تۇرعىن ۇيلەردە بولعان. سونىمەن قاتار، ءورت جاعدايلارى شارۋاشىلىق قۇرىلىستار مەن كوپقاباتتى ۇيلەردە دە ءجيى تىركەلگەن. كوپ جاعدايدا بۇل وقيعالاردىڭ الدىن الۋعا بولار ەدى – ەگەر قاراپايىم قاۋىپسىزدىك ەرەجەلەرى ساقتالعاندا.
كومىرقىشقىل گازىمەن ۋلانۋ دا ءالى دە بولسا جاسىرىن قاۋىپ بولىپ وتىر. اتالعان ماۋسىمدا 4 ادام، ونىڭ ىشىندە 2 بالا ۋلانعان. وكىنىشكە قاراي، ءبىر بالا كوز جۇمدى. وتكەن جىلى ۋلى گازدان كوز جۇمعاندار سانى بۇدان كوپ بولعانىمەن، ءاربىر مۇنداي جاعداي – شۇعىل ارەكەتكە شاقىراتىن دابىل.
الدىن الۋ ماقساتىندا تجد ماماندارى اۋقىمدى اقپاراتتىق-ءتۇسىندىرۋ جۇمىستارىن جۇرگىزدى. اۆتونومدى جىلىتۋ جۇيەسى بار جۇزدەگەن مىڭ ءۇي تەكسەرىلدى. ءۇي يەلەرىنە جابدىقتى قاۋىپسىز پايدالانۋ جونىندە كەڭەستەر بەرىلدى. الەۋمەتتىك وسال توپتارعا – كوپبالالى وتباسىلارعا، از قامتىلعان ازاماتتارعا، زەينەتكەرلەر مەن مۇمكىندىگى شەكتەۋلى جاندارعا ەرەكشە كوڭىل ءبولىندى. بۇل ساناتتاعى تۇرعىن ۇيلەرگە 1800-دەن استام ۋلى گاز داتچيگى ورناتىلدى. سولاردىڭ ءبىرى – ءبىرجان سال اۋدانىندا ىسكە قوسىلىپ، ەكى قاريانىڭ ءومىرىن ساقتاپ قالدى. جالپى، سوڭعى ءۇش جىلدا وسى قۇرىلعىلاردىڭ ارقاسىندا وبلىس بويىنشا 30 ادامنىڭ ءومىرى قۇتقارىلعان.
ءتۇسىندىرۋ جۇمىستارى بارلىق قولجەتىمدى ارنالار ارقىلى جۇرگىزىلدى. تەلەديدار مەن راديودا جۇزدەگەن باعدارلاما كورسەتىلدى، الەۋمەتتىك جەلىلەردە اقپاراتتىق جازبالار جاريالاندى، كوشەلەردە دىبىستىق حابارلاندىرۋلار تاراتىلدى. ساۋدا ورتالىقتارىنداعى LED-ەكراندار پايدالانىلىپ، تۇرعىن ۇيلەرگە QR-كودپەن جابدىقتالعان جادىنامالار ءىلىندى. سونىمەن قاتار، تۇرعىندارعا پوجار قاۋىپسىزدىگى ەرەجەلەرى تۋرالى SMS-حابارلامالار جىبەرىلىپ وتىردى. جەكە سەكتوردا ءورت ءسوندىرۋ كولىكتەرىنىڭ ءجۇرىپ وتۋىنە كەدەرگى كەلتىرەتىن بەتون كەدەرگىلەر الىنىپ تاستالدى، بۇل توتەنشە جاعداي كەزىندە ارەكەت ەتۋ ۋاقىتىن قىسقارتادى.
دەپارتامەنت وكىلدەرىنىڭ ايتۋىنشا، تۇرمىستا ورىن الاتىن ورتتەردىڭ نەگىزگى سەبەبى – ەرەسەكتەردىڭ نەمقۇرايلىلىعى. بۇل اسىرەسە ۇيدە قاراۋسىز قالاتىن بالالارعا قاتىستى. قۇتقارۋشىلار اتا-انالارعا بالالاردى قاراۋسىز قالدىرماۋعا، ولارعا قاۋىپسىزدىك ەرەجەلەرىن ۇنەمى ءتۇسىندىرىپ وتىرۋعا كەڭەس بەرەدى.
جىلۋ ماۋسىمىنىڭ اياقتالۋى بوساڭسۋعا سەبەپ ەمەس. ءورتتىڭ الدىن الۋ جۇمىستارى جاز مەزگىلىندە دە جالعاسادى. سەبەبى، دەپارتامەنت ماماندارى ايتقانداي، قاۋىپسىزدىك – ءار ادامنىڭ جاۋاپكەرشىلىگى مەن قامقورلىعىنان باستالادى.
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز