Aqmola oblysynda 2024–2025 jyldardaǧy jylu mausymynyŋ qorytyndysy şyǧaryldy: ört sany azaidy, aldyn alu şaralary küşeitıldı

Aqmola oblysynda 2024–2025 jyldardaǧy jylu beru mausymy öz märesıne jettı. Oblystyq tötenşe jaǧdailar departamentınıŋ mälımetınşe, eseptı kezeŋde ört sany men keltırılgen materialdyq şyǧyn kölemı azaiǧan. Alaida halyq, äsırese balalar arasyndaǧy qaza men jaraqat alu faktılerı älı de alaŋdatarlyq deŋgeide qalyp otyr. Ötken mausymda öŋırde barlyǧy 328 ört tırkelgen. Būl aldyŋǧy jylmen salystyrǧanda azdap tömen körsetkış. Ökınışke qarai, ört saldarynan 16 adam, sonyŋ ışınde 5 bala qaza tapty. Taǧy 5 adam jaraqat alǧan, onyŋ ekeuı – balalar. Qauıp-qaterge qaramastan, qūtqaruşylardyŋ käsıbi äreketınıŋ arqasynda 10 adam aman qaldy. Degenmen, kämeletke tolmaǧandardyŋ ölımı erekşe alaŋdauşylyq tuǧyzyp otyr. Örttıŋ basty sebepterı – peşter men elektr jabdyqtaryn dūrys paidalanbau. Örtterdıŋ jartysynan astamy jeke tūrǧyn üilerde bolǧan. Sonymen qatar, ört jaǧdailary şaruaşylyq qūrylystar men köpqabatty üilerde de jiı tırkelgen. Köp jaǧdaida būl oqiǧalardyŋ aldyn aluǧa bolar edı – eger qarapaiym qauıpsızdık erejelerı saqtalǧanda. Kömırqyşqyl gazymen ulanu da älı de bolsa jasyryn qauıp bolyp otyr. Atalǧan mausymda 4 adam, onyŋ ışınde 2 bala ulanǧan. Ökınışke qarai, bır bala köz jūmdy. Ötken jyly uly gazdan köz jūmǧandar sany būdan köp bolǧanymen, ärbır mūndai jaǧdai – şūǧyl äreketke şaqyratyn dabyl. Aldyn alu maqsatynda TJD mamandary auqymdy aqparattyq-tüsındıru jūmystaryn jürgızdı. Avtonomdy jylytu jüiesı bar jüzdegen myŋ üi tekserıldı. Üi ielerıne jabdyqty qauıpsız paidalanu jönınde keŋester berıldı. Äleumettık osal toptarǧa – köpbalaly otbasylarǧa, az qamtylǧan azamattarǧa, zeinetkerler men mümkındıgı şekteulı jandarǧa erekşe köŋıl bölındı. Būl sanattaǧy tūrǧyn üilerge 1800-den astam uly gaz datchigı ornatyldy. Solardyŋ bırı – Bırjan Sal audanynda ıske qosylyp, ekı qariianyŋ ömırın saqtap qaldy. Jalpy, soŋǧy üş jylda osy qūrylǧylardyŋ arqasynda oblys boiynşa 30 adamnyŋ ömırı qūtqarylǧan. Tüsındıru jūmystary barlyq qoljetımdı arnalar arqyly jürgızıldı. Teledidar men radioda jüzdegen baǧdarlama körsetıldı, äleumettık jelılerde aqparattyq jazbalar jariialandy, köşelerde dybystyq habarlandyrular taratyldy. Sauda ortalyqtaryndaǧy LED-ekrandar paidalanylyp, tūrǧyn üilerge QR-kodpen jabdyqtalǧan jadynamalar ılındı. Sonymen qatar, tūrǧyndarǧa pojar qauıpsızdıgı erejelerı turaly SMS-habarlamalar jıberılıp otyrdy. Jeke sektorda ört söndıru kölıkterınıŋ jürıp ötuıne kedergı keltıretın beton kedergıler alynyp tastaldy, būl tötenşe jaǧdai kezınde äreket etu uaqytyn qysqartady. Departament ökılderınıŋ aituynşa, tūrmysta oryn alatyn örtterdıŋ negızgı sebebı – eresekterdıŋ nemqūrailylyǧy. Būl äsırese üide qarausyz qalatyn balalarǧa qatysty. Qūtqaruşylar ata-analarǧa balalardy qarausyz qaldyrmauǧa, olarǧa qauıpsızdık erejelerın ünemı tüsındırıp otyruǧa keŋes beredı. Jylu mausymynyŋ aiaqtaluy bosaŋsuǧa sebep emes. Örttıŋ aldyn alu jūmystary jaz mezgılınde de jalǧasady. Sebebı, departament mamandary aitqandai, qauıpsızdık – är adamnyŋ jauapkerşılıgı men qamqorlyǧynan bastalady.