ەلىمىزدە سۋدىڭ زاڭسىز ساۋداسى تولىق جويىلماي تۇر. بۇل تۋرالى بۇگىن، 12 مامىردا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ايتتى، دەپ حابارلايدى «ادىرنا» ءتىلشىسى.
«بۇگىندە بۇكىل رەسپۋبليكا كولەمىندە كەلىسىمشارت جاساماي، «قازسۋشارمەن» سۋدى الۋ دەگەن ماسەلەلەر كەزدەسەدى. ءبىز قازىر كەلىسىمشارتتى جاساۋدى ەلەكتروندى تۇرگە كوشىرىپ جاتىرمىز. بۇدان بولەك، اقپاراتتىق تالداۋ ارقىلى شارۋا قوجالىعى سۋدى قانشالىقتى كەلىسىمشارتقا سايكەس الدى نەمەسە كاسساعا قانشا قاراجات ءتۇستى نە تۇسكەن جوق دەگەندى تەكسەرۋ ءۇشىن عارىشتىق مونيتورينگ ارقىلى جۇيەنى ەنگىزەيىن دەپ وتىرمىز. ول ماسەلەنى 100 پايىز شەشپەسە دە، بىزگە ۇلكەن قۇرال رەتىندە كومەكتەسەدى»،—دەدى مينيستر ماجىلىستە وتكەن ۇكىمەت ساعاتىندا.
ودان بولەك، نۇرجىگىتوۆ سۋ كودەكسى كۇشىنە ەنگەندە بۇرىن ينسپەكتسيالار اتقارىپ كەلگەن جۇمىستار ارنايى كوميتەتكە بەرىلەتىنىن، بۇل دا قاداعالاۋدى ءبىر جۇيەگە تۇسىرەتىنىن مالىمدەدى.
ايتا كەتەيىك، بىلتىر سۋ رەسۋرستارىن رەتتەۋ، قورعاۋ جانە پايدالانۋ كوميتەتى باسسەيندىك ينسپەكتسيالارى 439 تەكسەرىس جۇرگىزىپ، 1855 زاڭ بۇزۋشىلىقتى انىقتاپ، 429 ۇيعارىم بەرگەن. ناتيجەسىندە جالپى سوماسى 48,4 ملن تەڭگەگە 582 اكىمشىلىك ايىپپۇل سالىنعان.
