اۋعانستان بيلىگىندە وتىرعان «تاليبان»قوزعالىسىنىڭ قايىرلى ىستەردى ناسيحاتتاۋ جانە بۇزىقتىقتىڭ الدىن الۋ مينيسترلىگى شاحمات ويىنىن «حارام» (يسلام شاريعاتىنىڭ ءوز تۇسىندىرمەسىنە ساي تىيىم سالىنعان) دەپ جاريالاپ، بۇل سپورت ءتۇرىنىڭ فەدەراتسياسىن تاراتقانىن حابارلادى. بۇل تۋرالى Khaama.com سايتى جازدى، دەپ حابارلايدى “ادىرنا”.
اۋعانستاننىڭ سپورت مينيسترلىگىنىڭ وكىلدەرى شاحمات سپورتىنىڭ توقتاتىلعانىن راستادى. ولار شاحماتقا تىيىم يسلام شاريعاتىنا سايكەس كەلۋى انىقتالعانعا دەيىن جالعاساتىنىن ايتتى.
باسىلىمنىڭ مالىمەتىنشە، رەسمي تىيىم سالىنباس بۇرىن بىرنەشە شاحماتشى مەن اۋەسقويلار سپورت مينيسترلىگىنە ءىس-شارالار ۇيىمداستىرۋعا جانە قارجىلاي قولداۋعا رۇقسات سۇراپ جۇگىنگەن. الايدا بۇل ءوتىنىش كەرىسىنشە ولاردىڭ جاعدايىن قيىنداتىپ جىبەرگەن.
رەسەيلىك «سپورت-ەكسپرەسس» باسىلىمىنىڭ جازۋىنشا، اۋعانستانداعى شاحماتقا قاتىستى جاعداي تالىپتەر تۋرالى كەزەكتى «قورقىنىشتى اڭگىمەگە» اينالىپ كەتۋى مۇمكىن. ياعني شاحماتقا تىيىم ۇيىمدىق ماسەلەلەرمەن بايلانىستى بولۋى ىقتيمال. فەدەراتسيانىڭ بۇرىنعى باسشىسى باتىسقا كەتكەن سوڭ، جاڭادان تاعايىندالعان جەتەكشى وبايدۋللا كۋرايشي (ول 2022 جىلعى بۇكىلالەمدىك وليمپياداعا قۇرامانى اپارعان) «تاليباننىڭ» سپورت دەپارتامەنتىمەن بايلانىس ورناتا الماعان. بۇل جاعداي باسقارۋداعى داعدارىسقا اكەلىپ سوققان. سوندىقتان قازىرگى شەكتەۋلەر ءدىني ەمەس، كادرلىق سەبەپتەرمەن بايلانىستى بولۋى مۇمكىن. دەگەنمەن ماقالا اۆتورى يسلامداعى شاحماتقا قاتىستى بەلگىلى ءبىر قيىندىقتاردىڭ بار ەكەنىن دە جوققا شىعارمايدى.
سول ۋاقىتتا باسىلىم اۋعانستاننان تىس ءومىر ءسۇرىپ جاتقان (كوبىنە وزبەكستان مەن يراندا) تانىمال شاحماتشىلاردىڭ سوڭعى ءۇش جىلدا تاليباندار بيلىككە كەلگەننەن كەيىن شاحمات سپورتىن دامىتۋ مۇمكىن بولماي قالعانىنا ءجيى شاعىمدانعانىن اتاپ وتەدى. فەدەراتسيا بيلىكتىڭ قولداۋىن كورمەگەن، جەرگىلىكتى تۋرنيرلەر وتكىزۋگە قاراجات تابۋ قيىن بولعان جانە باسقارۋ جۇيەسىندە دە پروبلەمالار تۋىنداعان. الايدا باسىلىمنىڭ مالىمەتىنە سۇيەنسەك، شاحماتشىلاردىڭ پۇتقا تابىنۋشىلىق نەمەسە ءدىني داستۇرلەردى بۇزعانى ءۇشىن قۋعىنعا ۇشىراعانى تۋرالى ناقتى دەرەكتەر جوق. سونىمەن قاتار، اۋعانستاننان قاشقان كەيبىر شاحماتشىلار «بوسقىن» مارتەبەسى مەن جاردەماقى الۋ ءۇشىن جاعدايدى اسىرا ايتىپ جۇرگەن بولۋى مۇمكىن ەكەنى دە ايتىلادى.
بۇعان دەيىن تالىپتەر ەلدە ارالاس جەكپە-جەك (مما) پەن كەيبىر كيبەرسپورت تۇرلەرىنە، سونىڭ ىشىندە PUBG ويىنىنا تىيىم سالعان بولاتىن.
ايتا كەتەيىك، «تاليبان» — بۇۇ قاۋىپسىزدىك كەڭەسىنىڭ شەشىمىمەن تەرروريستىك ۇيىم رەتىندە تانىلعان قوزعالىس.
