اقمولا وبلىسىندا ءبىلىم، سپورت جانە مەديتسينا سالاسىندا 40-تان استام نىسان سالىنىپ جاتىر

793
Adyrna.kz Telegram
https://adyrna.kz/content/uploads/2025/05/whatsapp-image-2025-05-13-at-12.24.58-960x500.jpg?token=632022fb94e30b7c2d30de707d9541b4
2025 جىلدىڭ سوڭىنا دەيىن اقمولا وبلىسىندا 40-تان استام الەۋمەتتىك نىساننىڭ قۇرىلىسى جوسپارلانعان. بۇل ءوڭىر حالقىنىڭ ءومىر ءسۇرۋ ساپاسىن ارتتىرۋعا، سونىڭ ىشىندە وقۋشىلار مەن بالاباقشا تاربيەلەنۋشىلەرىنە ارنالعان ورىندار سانىن كوبەيتۋگە باعىتتالعان ماڭىزدى قادام. ءبىلىم بەرۋ سالاسىندا جاڭا مەكتەپتەر مەن بالاباقشالار پايدالانۋعا بەرىلگەننەن كەيىن شامامەن 1500 وقۋشى ورنى جانە 840 بالاباقشا ورنى اشىلادى. بۇل دەموگرافيالىق ءوسىم قارقىندى ءجۇرىپ جاتقان اۋداندارداعى ورىن تاپشىلىعى ماسەلەسىن شەشۋگە مۇمكىندىك بەرەدى. دەنساۋلىق ساقتاۋ باعىتىندا دا ءىرى جوبالار قولعا الىنعان. قوسشى قالاسىندا كوپبەيىندى ايماقتىق اۋرۋحانا سالىنىپ جاتىر. مۇندا ونكولوگيا، نەۆرولوگيا جانە شۇعىل مەديتسينالىق كومەك بولىمدەرى جۇمىس ىستەيتىن بولادى. سونىمەن قاتار مەديتسينالىق قىزمەتكەرلەرگە ارنالعان ەكى تۇرعىن ءۇي مەن پانسيونات سالۋ جوسپارلانعان. سپورت سالاسىندا دا ىلگەرىلەۋ بايقالادى. كوكشەتاۋ قالاسىندا كوپفۋنكتسيونالدى سپورت كەشەنىنىڭ قۇرىلىسى ءجۇرىپ جاتىر. كەشەندە 650 ورىندىق كورەرمەن زالى، سونداي-اق بوكس، كۇرەس، اۋىر اتلەتيكا جانە كروسسفيتكە ارنالعان ارنايى زالدار بولادى. سىرتقى اۋماقتا جەڭىل اتلەتيكالىق جولاقتار، جاتتىعۋ جانە ويىن الاڭدارى ورنالاستىرىلادى. زەرەندا اۋىلىندا تاعى ءبىر سپورت نىسانى بوي كوتەرۋدە. مۇندا 1500-دەن استام ءجاسوسپىرىم سپورتپەن شۇعىلدانا الادى. قۇرىلىس جۇمىستارى قارقىندى ءجۇرىپ جاتىر. ۋچاسكە باستىعى ءسالىمالماس قۋاتۇلىنىڭ ايتۋىنشا، قازىرگى ۋاقىتتا جابدىقتار ورناتىلۋدا، ال نىسان ماۋسىم ايىنىڭ سوڭىندا پايدالانۋعا بەرىلەدى دەپ جوسپارلانعان. اتالعان جوبالار – اقمولا وبلىسىنىڭ الەۋمەتتىك ينفراقۇرىلىمىن دامىتۋعا باعىتتالعان كەشەندى باعدارلامالاردىڭ ناتيجەسى. بۇل جۇمىستار ءوڭىر تۇرعىندارىنىڭ ساپالى ءبىلىم الۋى، سپورتپەن شۇعىلدانۋى جانە زاماناۋي مەديتسينالىق كومەككە قول جەتكىزۋىنە مۇمكىندىك بەرەدى.
پىكىرلەر