اقش پرەزيدەنتى دونالد ترامپ سيرياعا سالىنعان سانكتسيالاردى الىپ تاستاۋ تۋرالى شەشىم قابىلداعانىن جاريالادى، دەپ حابارلايدى "ادىرنا" ۇلتتىق پورتالى euronews-كە سىلتەمە جاساپ.
سونداي-اق، اقش مەملەكەتتىك حاتشىسى ماركو رۋبيو سارسەنبى كۇنى تۇركيادا سيريانىڭ اۋىسپالى ۇكىمەتىنىڭ سىرتقى ىستەر ءمينيسترى اساد ءال-شايبانيمەن كەزدەسەتىنىن مالىمدەدى.
اقش باسشىسىنىڭ ايتۋىنشا، بۇل شەشىم ساۋد ارابياسىنىڭ تاق مۇراگەرى مۇحاممەد بين سالمان جانە تۇركيا پرەزيدەنتى رەجەپ تايىپ ەردوعانمەن سيرياداعى جاعدايدى تالقىلاعاننان كەيىن قابىلدانعان.
Axios باسىلىمى سيريانىڭ اۋىسپالى پرەزيدەنتى ەر-ريادقا ساپارى بارىسىندا ترامپ پەن اش-شاراا اراسىندا كەزدەسۋ ءوتۋى مۇمكىن ەكەنىن حابارلادى.
The National گازەتى دەرەككوزدەرگە سىلتەمە جاساپ، ترامپ اش-شارااعا " ۋاقىت بولۋگە" كەلىسكەنىن جازدى. بۇل كەزدەسۋ پارسى شىعاناعى ەلدەرى مەن اقش اراسىنداعى سامميت اياسىندا وتەتىن بولادى.
ديپلوماتيالىق دەرەككوزدەرگە سۇيەنسەك، اش-شاراا سارسەنبى كۇنى ساۋد ارابياسىنا كەلىپ، ترامپپەن 45 مينۋتتىق كەلىسسوز وتكىزەدى.
اقش بۇل كەزدەسۋدى رەسمي تۇردە ءالى راستاعان جوق.
"سانكتسيالاردى جويۋ – پرەزيدەنت اش-شاراا ءۇشىن باسىم ماسەلە", – دەپ اتاپ ءوتتى دەرەككوزدەر.
جاقىن شىعىسقا ساپارى الدىندا ترامپ:
"سانكتسيالارعا قاتىستى شەشىم قابىلداۋعا تۋرا كەلەدى، جانە، بالكىم، ءبىز ولاردى سيرياعا قاتىستى جاقىندا الىپ تاستايمىز، ويتكەنى ءبىز ولارعا مۇمكىندىك بەرگىمىز كەلەدى", – دەدى.
بۇل مالىمدەمە سيريانى ون جىلدان استام ۋاقىتقا سوزىلعان جويقىن ازاماتتىق سوعىستان كەيىن قالپىنا كەلتىرۋگە باعىتتالعان حالىقارالىق كۇش-جىگەر اياسىندا ايتىلدى.
داماسك تاراتقان مالىمدەمەدە ترامپتىڭ سوزدەرى سيريالىق حالىقتىڭ ازابىن جەڭىلدەتۋگە باعىتتالعان ءۇمىت سىيلايتىن قادام رەتىندە باعالاندى.
ەگەر ترامپ پەن اش-شاراا اراسىنداعى كەزدەسۋ وتسە، بۇل تاريحي وقيعا بولماق. ول ەكى ەل اراسىنداعى ۇزاق جىلدارعا سوزىلعان قاقتىعىستان كەيىن قارىم-قاتىناستىڭ جاڭا كەزەڭىنە جول اشۋى مۇمكىن.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز