اقمولا وبلىسىنىڭ زەرەندى اۋدانىنا قاراستى بىرلەستىك اۋىلىندا الداعى ۋاقىتتا جوعارى جىلدامدىقتى ءموبيلدى ينتەرنەت قولجەتىمدى بولادى. مۇندا جاڭا انتەننا-ماچتالىق ستانتسيا ورناتۋ جوسپارلانىپ وتىر. بۇل — بىرنەشە جىل بويى تسيفرلىق بايلانىستىڭ قيىندىعىن كورىپ كەلگەن جەرگىلىكتى تۇرعىندار ءۇشىن كوپتەن كۇتكەن جاڭالىق.
بىرلەستىك اۋىلى كوكشەتاۋ قالاسىنان نەبارى 50 شاقىرىم جەردە ورنالاسقان. مۇندا 450-دەن استام ادام تۇرادى. قازىرگى تاڭدا اۋىلدا تەك 3G دەڭگەيىندەگى بايلانىس بار، الايدا بۇل جىلدامدىق كۇندەلىكتى قاجەتتىلىكتەر ءۇشىن جەتكىلىكسىز.
«بۇگىنگى تاڭدا ادامدارمەن سويلەسۋ نەمەسە مەملەكەتتىك قىزمەتتەردى الۋ ءۇشىن ينتەرنەت كەرەك. ەندى بۇل ماسەلە شەشىلەتىنىنە قۋانىشتىمىز. بۇل جاڭالىق اۋىل تۇرعىندارىنىڭ ءومىرىن ايتارلىقتاي جەڭىلدەتەدى»، — دەيدى اۋىل تۇرعىنى نۇرتاي مۇقىشەۆ.بايلانىس ساپاسى جاقسارعان سوڭ، بالالار ونلاين پلاتفورمالاردا ساپالى ءبىلىم الا الادى، ال اتا-انالار ولاردىڭ وقۋىن باقىلاۋعا مۇمكىندىك الادى. اقمولا وبلىسى تسيفرلاندىرۋ باسقارماسىنا قاراستى Smart Aqmola ءبولىمىنىڭ باسشىسى ولجاس قامي حابارلاعانداي، جاڭا ستانتسيا قۇرىلىسى اۋىلدىڭ 3G-دەن 4G LTE فورماتىنا كوشۋىن قامتاماسىز ەتەدى.
«جوبا «قولجەتىمدى ينتەرنەت» ۇلتتىق جوباسى اياسىندا جۇزەگە اسىرىلىپ جاتىر»، — دەپ ءتۇسىندىردى ول. — «ءبىز بۇل باستامانى مەملەكەتتىك-جەكەمەنشىك ارىپتەستىك نەگىزىندە ىسكە اسىرىپ كەلەمىز. جالپى، جاڭعىرتۋ جوسپارىنا شامامەن 80 مىڭ تۇرعىنى بار 102 اۋىلدىق ەلدى مەكەن ەنگىزىلگەن. بۇگىندە وبلىس بويىنشا 430 اۋىل ينتەرنەتپەن قامتىلعان، ال ۇيالى بايلانىس 98% تۇرعىنعا قولجەتىمدى».بىرلەستىكتەگى ستانتسيا قۇرىلىسى اۋىلدىق جەرلەردى تسيفرلاندىرۋعا باعىتتالعان جۇيەلى جۇمىستىڭ ءبىر بولىگى بولماق. جاقىن ايلاردا اۋىل تۇرعىندارى تۇراقتى ءارى جوعارى جىلدامدىقتى ينتەرنەتكە قول جەتكىزەتىن بولادى. بۇل ءبىلىم، كاسىپكەرلىك پەن كوممۋنيكاتسيا سالالارىندا جاڭا مۇمكىندىكتەر اشاتىنى ءسوزسىز.
