اقمولا وبلىسىندا قاڭعىباس يتتەردىڭ كوبەيۋى تۇرعىندار اراسىندا وزەكتى ءارى الاڭداتارلىق ماسەلەگە اينالدى. سوڭعى جىلدارى بالالار الاڭدارىنا، مەكتەپتەردىڭ ماڭىنا جانە تۇرعىن ءۇي ماسسيۆتەرىنە قاڭعىباس يتتەردىڭ شوعىرلانۋى تۋرالى شاعىمدار جيىلەي ءتۇستى. الايدا بۇل تۇيتكىل تەك قاۋىپسىزدىك قانا ەمەس، سونىمەن قاتار گۋمانيزم قاعيداتىن ساقتاي وتىرىپ شەشىلۋى ءتيىس مىندەت.
اقمولا وبلىستىق ۆەتەريناريا باسقارماسىنىڭ باسشىسى تالعات ءجۇنىسوۆتىڭ ايتۋىنشا، بۇل ماسەلە تەك زاڭ اياسىندا، قاتاڭ ەمەس، تەك گۋماندى ادىستەرمەن شەشىلۋدە.
«ءبىز بۇل پروبلەمانى جۇيەلى ءارى اشىق تۇردە شەشۋگە تىرىسامىز. بارلىق جۇمىس زاڭ شەڭبەرىندە، قاتىگەزدىككە جول بەرىلمەيدى»، — دەيدى تالعات ءجۇنىسوۆ.2024 جىلى قاڭعىباس جانۋارلار سانىن رەتتەۋگە باعىتتالعان ءتورت باعدارلاماعا وبلىستىق بيۋدجەتتەن 96,5 ميلليون تەڭگە ءبولىندى. بۇل قارجى يتتەردى اۋلاۋ، ستەريليزاتسيالاۋ، ۆاكتسيناتسيالاۋ، چيپتەۋ جانە ارنايى جابدىقتالعان ورىنداردا ۇستاۋ جۇمىستارىنا جۇمسالۋدا.
«بۇگىنگە دەيىن 6 مىڭنان استام يت اۋلاندى. ونىڭ 2,5 مىڭنان استامى ستەريليزاتسيادان جانە ۆاكتسيناتسيادان ءوتتى. بۇل – جاي عانا ستاتيستيكا ەمەس، بۇل ناقتى قاۋىپتىڭ ازايۋى مەن اۋرۋلاردىڭ تارالۋىنىڭ الدىن الۋ»، — دەدى باسقارما باسشىسى.سونىمەن قاتار، مەردىگەر ۇيىمداردىڭ جۇمىسى قاتاڭ باقىلاۋدا. ءاربىر اۋلاۋ ارەكەتى فوتو جانە بەينەفيكساتسيا ارقىلى قۇجاتتالىپ، اي سايىنعى ەسەپ بەرىلەدى. سانيتارلىق تالاپتاردىڭ ورىندالۋىنا دا باسا نازار اۋدارىلادى.
«ەگەر قانداي دا ءبىر نورمالار بۇزىلسا، بۇل – ءبىز ءۇشىن سەرىكتەستىككە قايتا باعا بەرۋگە سەبەپ. مۇنداي جاعدايلارعا ءبىز دەرەۋ ارەكەت ەتەمىز»، — دەپ ناقتىلادى ءجۇنىسوۆ.باسقارما ازاماتتاردان كەلىپ تۇسكەن وتىنىشتەرگە دە دەر كەزىندە ارەكەت ەتەدى. بەلگىلى ءبىر اۋماقتا يتتەردىڭ كوبەيگەنى تۋرالى اقپارات كەلىپ تۇسكەن ساتتە ماماندار دەرەۋ وقيعا ورنىنا شىعادى. قاڭعىباس يتتەر ماسەلەسىن بولدىرماۋ ماقساتىندا باسقارما ءتۇسىندىرۋ جۇمىستارىن دا تۇراقتى جۇرگىزىپ كەلەدى. حالىق اراسىندا ءۇي جانۋارلارىنا جاۋاپكەرشىلىكپەن قاراۋ تۋرالى كەزدەسۋلەر مەن اقپاراتتىق تۇسىندىرۋلەر ۇيىمداستىرىلادى.
«وكىنىشكە قاراي، قاڭعىباس يتتەردىڭ باسىم بولىگى — بۇرىنعى ءۇي جانۋارلارى. يەلەرى ولاردى كوشەگە تاستاپ كەتەدى. سوندىقتان ءبىز ءاربىر ازاماتقا ۇندەۋ جولدايمىز: جانۋارلاردى باقىلاۋسىز قالدىرماڭىزدار، مىندەتتى تۇردە ستەريليزاتسيا جاساڭىزدار»، — دەدى ۆەتەريناريا باسقارماسىنىڭ باسشىسى.باسقارما بۇل جۇمىستىڭ ماۋسىمدىق ەمەس، تۇراقتى تۇردە، كەشەندى نەگىزدە جۇرگىزىلەتىنىن ايتادى. بۇل كۇرەستە تەك مەملەكەتتىك ورگانداردىڭ كۇشى جەتكىلىكسىز. ازاماتتاردىڭ بەلسەندى قاتىسۋى اسا ماڭىزدى.
«ءبىز حالىقتىڭ قاۋىپسىزدىگىن قامتاماسىز ەتۋگە جانە جانۋارلارعا قاتىستى گۋمانيزم قاعيداتىن ۇستانۋعا دايىنبىز. بىراق بۇل جۇمىس قوعاممەن سەرىكتەستىكتە عانا ءتيىمدى بولماق. تەك بىرگە ارەكەت ەتكەندە عانا اۋلالارىمىز بەن كوشەلەرىمىزدى ادامدار مەن جانۋارلار ءۇشىن قاۋىپسىز ەتە الامىز»، — دەپ تۇيىندەدى تالعات ءجۇنىسوۆ.
