رەسەي پرەزيدەنتى ۆلاديمير پۋتين ۋكراينامەن كەلىسسوزدەر جۇرگىزۋ ءۇشىن رەسەي دەلەگاتسياسىنىڭ قۇرامىن بەكىتتى. بۇل تۋرالى 2025 جىلدىڭ 14 مامىرىندا جاريالانعان رەسمي قۇجاتتا ايتىلعان، دەپ حابارلايدى "ادىرنا" ۇلتتىق پورتالى TRT-گە سىلتەپ.
دەلەگاتسيانى رەسەي پرەزيدەنتىنىڭ كومەكشىسى ۆلاديمير مەدينسكي باسقارادى. قۇرامدا رەسەيدىڭ سىرتقى ىستەر ءمينيسترىنىڭ ورىنباسارى ميحايل گالۋزين، باس شتابتىڭ باس باسقارماسىنىڭ باستىعى يگور كوستيۋكوۆ جانە قورعانىس ءمينيسترىنىڭ ورىنباسارى الەكساندر فومين بار.
ساراپشىلار توبىنا ءتۇرلى مەملەكەتتىك قۇرىلىمداردىڭ جوعارى لاۋازىمدى وكىلدەرى كىردى. ولاردىڭ قاتارىندا گەنشتاب، پرەزيدەنت اكىمشىلىگى جانە سىرتقى ىستەر مينيسترلىگىنىڭ وكىلدەرى بار.
2025 جىلدىڭ 15 مامىرىندا تاڭەرتەڭ رەسەي دەلەگاتسياسى تۇركيانىڭ ستامبۋل قالاسىنداعى اتاتۇرىك اۋەجايىنا قوندى. كەلىسسوزدەر دولماباحچە سارايىندا وتەدى دەپ جوسپارلانۋدا.
ال رەسەي پرەزيدەنتى پۋتين كەلىسسوزدەرگە قاتىسپايدى. وسى جاڭالىقتان كەيىن اقش پرەزيدەنتى دونالد ترامپ تا جەكە قاتىسۋدان باس تارتتى.
ۋكراينا تاراپىنان دەلەگاتسيانى پرەزيدەنت كەڭسەسىنىڭ باسشىسى اندرەي ەرماك باسقارادى. سونىمەن قاتار ۋكراينا پرەزيدەنتى ۆلاديمير زەلەنسكي دە تۇركياعا كەلدى. ول بۇعان دەيىن كەلىسسوزگە تەك پۋتينمەن تىكەلەي قاتىسۋعا دايىن ەكەنىن مالىمدەگەن بولاتىن. الايدا ول كيەۆتىڭ كەز كەلگەن فورماتتاعى كەلىسسوزدەرگە اشىق ەكەنىن اتاپ ءوتتى.
ۋكراينانىڭ سىرتقى ىستەر ءمينيسترى اندرەي سيبيگا تۇركيانىڭ بەيبىت پروتسەستەگى ءرولىن ەرەكشە اتاپ ءوتتى. ول تۇركيا ءسىم باسشىسى حاكان فيدانمەن كەزدەسۋىندە انكاراعا العىس ايتىپ، تۇركيانىڭ دەلدال رەتىندەگى بەلسەندىلىگىن جوعارى باعالادى.
«قازىرگى تاڭدا الەمدىك ديپلوماتيانىڭ ەپيتسەنترى تۇركيادا. بۇل ەل بەيبىت پروتسەستە ماڭىزدى ءرول اتقارىپ وتىر. ءبىز بۇعان ريزامىز»، – دەدى سيبيگا ءوزىنىڭ X (بۇرىنعى Twitter) پاراقشاسىندا.
