رەسەي پرەزيدەنتى سايلاۋىندا ۆلاديمير پۋتين 87,3%-دان استام داۋىس جيناپ، جەڭىسكە جەتتى. ءپۋتيندى ورتالىق ازيا باسشىلارى قۇتتىقتاۋعا اسىعۋدا، دەپ حابارلايدى “ادىرنا” ۇلتتىق پورتالى.
العاشقىلاردىڭ ءبىرى بولىپ وزبەكستان پرەزيدەنتى شاۆكات ميرزيەەۆ سايلاۋ ناۋقانى ءساتتى وتۋىمەن قۇتتىقتادى. قۇتتىقتاۋدى وزبەكستان پرەزيدەنتىنىڭ ءباسپاسوز حاتشىسى شەرزود اسادوۆ جاريالادى.
ميرزيەەۆ جولداۋىندا ءپۋتيننىڭ سەنىمدى جەڭىسكە جەتكەنىن باسا ايتتى.
وزبەكستان پرەزيدەنتى سايلاۋشىلاردىڭ جوعارى بەلسەندىلىگى مەن داۋىستاردىڭ جوعارى پايىزى رەسەيلىكتەردىڭ باسىم بولىگىنىڭ سەنىمىن جانە ۆلاديمير ءپۋتيننىڭ ساياسي باعىتى مەن الەۋمەتتىك-ەكونوميكالىق رەفورمالارىن قولدايتىنىن راستايدى دەپ سانايدى.
ميرزيەەۆ جولداۋىن پۋتينگە دەنساۋلىق پەن باق-بەرەكە، ال رەسەي ازاماتتارىنا بەيبىتشىلىك پەن گۇلدەنۋ تىلەۋمەن اياقتادى.
تاجىكستان پرەزيدەنتى ەمومالي راحمون دا رەسەيلىك ارىپتەسىنە جەدەلحات جولداپ، جەڭىسىمەن قۇتتىقتادى. جولداۋ ءماتىنى تاجىكستان باسشىسىنىڭ سايتىندا جاريالانعان.
«ءسىزدى پرەزيدەنتتىك سايلاۋداعى سەنىمدى جەڭىسىڭىزبەن شىن جۇرەكتەن قۇتتىقتايمىن. سوڭعى داۋىس بەرۋدىڭ ناتيجەلەرى ءسىزدىڭ جوعارى ساياسي بەدەلىڭىزدىڭ جانە ەلدىڭ تۇراقتى الەۋمەتتىك-ەكونوميكالىق دامۋىن قامتاماسىز ەتۋ جانە ونىڭ حالىقارالىق ۇستانىمدارىن نىعايتۋ جونىندەگى مەملەكەتتىك باعىتىڭىزدى رەسەيلىك قوعام تاراپىنان كەڭ قولداۋدىڭ تاعى ءبىر ايقىن دالەلى»، - دەلىنگەن حابارلامادا.
تاجىكستان پرەزيدەنتى ماسكەۋمەن ستراتەگيالىق سەرىكتەستىكتى نىعايتۋ دۋشانبە ءۇشىن ماڭىزدى ەكەنىن اتاپ ءوتتى. راحمون ەكىجاقتى قارىم-قاتىناستىڭ قارقىندى دامۋىنا ۆلاديمير ءپۋتيننىڭ جەكە ۇلەسى ىقپال ەتىپ وتىرعانىن اتاپ ءوتتى.
تاجىكستان پرەزيدەنتى مەملەكەتارالىق قارىم-قاتىناستاردى جاڭا دەڭگەيگە كوتەرۋ ءۇشىن رەسەيلىك ارىپتەسىمەن ودان ءارى بەلسەندى جۇمىس ىستەۋگە بەيىلدى ەكەنىن قوستى.
قىرعىز رەسپۋبليكاسىنىڭ پرەزيدەنتى سادىر جاپاروۆ تا ۆلاديمير پۋتينمەن تەلەفون ارقىلى سويلەسىپ، قۇتتىقتادى.
سادىر جاپاروۆ ۆلاديمير ءپۋتيندى پرەزيدەنتتىك سايلاۋداعى سەنىمدى جەڭىسىمەن قۇتتىقتاپ، بۇل رەسەي مەملەكەتىنىڭ مەملەكەتتىك تاۋەلسىزدىكتى نىعايتۋداعى، حالىقتىڭ ءال-اۋقاتىن ارتتىرۋداعى دانا ساياساتى مەن جانقيارلىق ەڭبەگىن ورىس حالقىنىڭ جوعارى باعالاپ، قولداۋىنىڭ ايقىن دالەلى ەكەنىن ايتتى.
سونداي-اق، ول قىرعىزستان مەن رەسەي اراسىنداعى وداقتاستىق جانە ستراتەگيالىق سەرىكتەستىك قاتىناستارىن ودان ءارى نىعايتۋ بويىنشا بىرلەسكەن كۇش-جىگەر باسىم سالالارداعى مەملەكەتارالىق ءوزارا ءىس-قيمىلدىڭ بۇكىل كەشەنىن دامىتۋعا ىقپال ەتەدى دەپ سانايدى.
ەكى ەل باسشىلارى قىرعىز-رەسەي ەكىجاقتى جانە كوپجاقتى ىنتىماقتاستىعىنىڭ وزەكتى ماسەلەلەرىن، ينتەگراتسيالىق وداقتار اياسىنداعى ەلدەردىڭ ءوزارا ءىس-قيمىلىن، سونداي-اق ماسكەۋدە وتەتىن جوعارى ەۋرازيالىق ەكونوميكالىق كەڭەستىڭ مەرەيتويلىق وتىرىسىن تالقىلادى. اعىمداعى جىلدىڭ مامىرىندا اتالعان مەرەيتويعا سادىر جاپاروۆ قاتىسپاق.
ايتا كەتەيىك، بۇعان دەيىن قازاقستان پرەزيدەنتى قاسىم-جومارت توقاەۆتىڭ ۆلاديمير ءپۋتيندى قۇتتىقتاۋ جەدەلحاتىن جاريالاعان ەدىك.
ءپۋتيندى قۇتتىقتاعاندار اراسىندا قازاقستان، تاجىكستان، وزبەكستان پرەزيدەنتتەرىنەن بولەك، بوليۆيا لۋيس ارسە، نيكاراگۋا دانيەل ورتەگا، گوندۋراس سيومارا كاسترو جانە كۋبا ميگەل دياس-كانەل بار. سونىمەن قاتار مولدوۆا گاگاۋز اۆتونوميالىق رەسپۋبليكاسىنىڭ باسشىسى ەۆگەنيا گۋتسۋل مەن ميانما پرەمەر-ءمينيسترى مين اۋن حلاينگ قۇتتىقتاۋ جولدادى.
ەلدەگى زاڭدار مەن كونستيتۋتسيانى ءوز بىلگەنىنشە وزگەرتىپ كەلە جاتقان پۋتين 2000 جىلدان بەرى بيىل بەسىنشى رەت سايلاۋعا تۇسكەن.
