اقمولا وبلىسىندا اۋىلدىق مەديتسينانى دامىتۋ قالاي جۇزەگە اسۋدا؟

اقمولا وبلىسىندا اۋىلدىق دەنساۋلىق ساقتاۋ سالاسى قارقىندى دامىپ كەلەدى. سوڭعى جىلدارداعى جەتىستىكتەر مەن جۇزەگە اسىپ جاتقان جوبالار ءوڭىردىڭ اۋىل تۇرعىندارى ءۇشىن مەديتسينالىق كومەكتىڭ قولجەتىمدىلىگى مەن ساپاسىنىڭ ارتىپ كەلە جاتقانىن دالەلدەيدى. بۇگىندە وبلىستاعى مەديتسينالىق ۇيىمدار جەلىسى 561 مەكەمەدەن تۇرادى، ونىڭ 522-ءسى اۋىلدىق ەلدى مەكەندەردە ورنالاسقان. بۇل مەكەمەلەر جالپى سانى 788 مىڭنان استام ادامعا قىزمەت كورسەتەدى، سونىڭ ىشىندە 329 مىڭعا جۋىق ادام – اۋىل تۇرعىندارى. اعىمداعى جىلدىڭ سوڭىنا دەيىن وبلىستىڭ اۋىلدارىندا 38 جاڭا مەديتسينالىق نىسان – دارىگەرلىك امبۋلاتوريالار، فەلدشەرلىك-اكۋشەرلىك پۋنكتتەر (فاپ) جانە مەديتسينالىق پۋنكتتەر اشىلادى. بۇل ماقساتقا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا بيۋدجەتتەن 10 ميلليارد تەڭگەگە جۋىق قاراجات بولىنگەن. جاڭا نىساندار زاماناۋي تالاپتارعا ساي جابدىقتالىپ، قاجەتتى مەديتسينالىق كادرلارمەن، دارىگەرلەرمەن جانە سانيتارلىق كولىكپەن قامتاماسىز ەتىلەدى. بۇل 43 مىڭنان استام اۋىل تۇرعىنىنا ساپالى ءارى ۋاقتىلى مەديتسينالىق كومەك كورسەتۋگە مۇمكىندىك بەرەدى. وبلىستا جىلجىمالى مەديتسينالىق كومەك تە بەلسەندى دامۋدا. قازىرگى تاڭدا 11 ءموبيلدى مەديتسينالىق كەشەن بارلىق اۋداندى قامتىپ، 1492 دياگنوستيكالىق زەرتتەۋ جۇرگىزگەن. سونىڭ ارقاسىندا جۇرەك-قان تامىرلارى اۋرۋلارى، گلاۋكوما، قانت ديابەتى سىندى كوپتەگەن اۋرۋ تۇرلەرى ەرتە كەزەڭدە انىقتالىپ، ءتيىستى ەمدەۋ شارالارى قولعا الىندى. بۇل – اۋىل تۇرعىندارىنىڭ ءومىر ساپاسىن جاقسارتۋعا باعىتتالعان ناقتى قادام. تاعى ءبىر ماڭىزدى باعىت – تەلەمەديتسينا قىزمەتىن ەنگىزۋ. بۇل شالعاي اۋىل تۇرعىندارى ءۇشىن ەرەكشە ماڭىزدى. قازىردىڭ وزىندە 50 مىڭنان استام قاشىقتان مەديتسينالىق كەڭەس بەرىلگەن. بۇل ناۋقاستارعا الىس اۋدان ورتالىقتارىنا بارماي-اق، قاجەتتى مەديتسينالىق كومەك الۋعا مۇمكىندىك بەرەدى. جىل وتكەن سايىن مەديتسينالىق قىزمەتتەردىڭ قولجەتىمدىلىگى ارتىپ، كورسەتىلەتىن كومەكتىڭ ساپاسى جاقسارىپ كەلەدى. اقمولا وبلىسى ءوز تۇرعىندارىنىڭ دەنساۋلىعىن جاقسارتۋعا باعىتتالعان جۇمىستاردى تاباندى تۇردە جالعاستىرۋدا. بۇل – اۋىل حالقى ءۇشىن جايلىلىقتى ارتتىرىپ، مەديتسينا سالاسىنىڭ شىنايى قولجەتىمدى بولۋىنا جول اشاتىن ماڭىزدى باعىت.