قازاقستاننىڭ بىرقاتار ايماعىندا 40 گرادۋسقا دەيىن ىستىق بولادى. بۇل تۋرالى «قازگيدرومەتكە» سىلتەمە جاساپ، توتەنشە جاعدايلار مينيسترلىگى مالىمدەدى، دەپ حابارلايدى ”ادىرنا” ۇلتتىق پورتالى.
«قازگيدرومەتتىڭ» مالىمەتىنشە، 16-17 مامىر كۇندەرى الماتى وبلىسىنىڭ باتىسى مەن سولتۇستىگىندە، جەتىسۋ وبلىسىنىڭ وڭتۇستىگىندە، شىعىسىندا جانە اباي، شىعىس قازاقستان وبلىستارىنىڭ وڭتۇستىگىندە كۇن قاتتى ىسىپ، 40 گرادۋسقا دەيىن جەتەدى.
بۇل كۇندەرى الماتىدا كۇن 35 گرادۋسقا دەيىن ىسيدى. ال قوناەۆتا 37 گرادۋس ىستىق بولادى دەگەن بولجام جاسالدى.
جامبىل وبلىسىندا سىناپ باعاناسى 40 گرادۋسقا دەيىن كوتەرىلسە، قىزىلوردا وبلىسىندا 40-44 گرادۋس قاتتى ىستىق ساقتالادى.
سونداي-اق قاراعاندى وبلىسىندا 35 گرادۋس، ۇلىتاۋ وبلىسىندا 35-37 گرادۋسقا دەيىن ىستىق بولادى.
اپتاپ ىستىققا بايلانىستى اتالعان وڭىرلەردە جوعارى ءورت قاۋپى ساقتالادى.
ال استانا، كوكشەتاۋ سولتۇستىك قازاقستان، پاۆلودار، قوستاناي وبلىستارىندا نايزاعاي ويناپ، جەل سوعادى. اتالمىش ايماقتا جەل كۇشەيىپ، تۇمان تۇسەدى. پاۆلودار جانە قوستاناي وبلىستارىندا بۇرشاق ءتۇسۋى مۇمكىن.
ەلدىڭ باتىس ايماعى – اتىراۋ، باتىس قازاقستان، اقتوبە، ماڭعىستاۋ وبلىستارىندا جەل ەكپىنى كۇشەيىپ، نايزاعاي كۇتىلەدى.
18 مامىردان باستاپ ەلدىڭ سولتۇستىگى مەن ورتالىق وڭىرلەرىندە كۇن رايى كۇرت وزگەرىپ، اۋا تەمپەراتۋراسى 10-15 گرادۋسقا دەيىن تومەندەپ، قاتتى جاڭبىر جاۋادى. اتاپ ايتقاندا سولتۇستىك قازاقستان، اقمولا وبلىستارىندا جاڭبىر، نايزاعاي، بۇرشاق، داۋىل بولادى دەپ كۇتىلەدى. استانا قالاسىندا قاتتى داۋىل بولىپ، جاڭبىر جاۋىپ، سوڭى بۇرشاققا اينالۋى مۇمكىن.
كۇن رايى ۇلىتاۋ وبلىسى مەن قاراعاندى وبلىسىندا دا ءدال وسىلاي وزگەرۋى مۇمكىن. بۇل ايماقتاردا دا داۋىل، نايزاعاي، جاڭبىر كۇتىلىپ، سوڭ بۇرشاققا اينالۋى مۇمكىن.
