اقمولا وبلىسىنىڭ بۇلاندى اۋدانىندا «دۇرىس تاماقتانۋدى دامىتۋ جانە كەڭەيتۋگە قوسقان ۇلەس» اتتى پيلوتتىق جوبا رەسمي تۇردە باستاۋ الدى. بۇل باستاما بۇۇ-نىڭ ازىق-تۇلىك جانە اۋىل شارۋاشىلىعى ۇيىمىنىڭ (فاو) تەحنيكالىق قولداۋىمەن، قازاقستان رەسپۋبليكاسى دەنساۋلىق ساقتاۋ، اۋىل شارۋاشىلىعى جانە وقۋ-اعارتۋ مينيسترلىكتەرىمەن سەرىكتەستىكتە جۇزەگە اسىرىلۋدا.
پيلوتتىق جوبا ماكينسك قالاسىنداعى ەكى مەكتەپتى — گيمنازيا مەن بالۋان شولاق اتىنداعى مەكتەپ-ليتسەيدى قامتيدى. جاڭارتىلعان ءمازىر 393 وقۋشىعا ارنالعان. جاڭا مەكتەپتىك تاماقتانۋ جۇيەسى سالاۋاتتى ءومىر سالتىنىڭ قاعيداتتارىنا نەگىزدەلگەن: اس ءمازىرى اقۋىز، ماي جانە كومىرسۋلاردىڭ تەپە-تەڭدىگىن ساقتاي وتىرىپ ازىرلەنگەن، بالالاردىڭ تالعامىن ەسكەرەدى جانە نەگىزىنەن جەرگىلىكتى ونىمدەرگە سۇيەنەدى.
بۇلاندى اۋدانىنىڭ تۇراقتى دامۋ قورىنىڭ ديرەكتورى دانيار نۇرپەيىسوۆتىڭ ايتۋىنشا، جوبانىڭ نەگىزگى تەتىكتەرىنىڭ ءبىرى — جەرگىلىكتى اۋىل شارۋاشىلىعى وندىرۋشىلەرىن جەتكىزۋ تىزبەگىنە تارتۋ. ونىڭ مالىمەتىنشە، ازىق-تۇلىكتىڭ شامامەن 60 پايىزى — كوكونىس، ەت جانە ءسۇت ونىمدەرى — وڭىرلىك فەرمەرلەردەن ساتىپ الىنادى. بۇل مەكتەپ اسحانالارىن جاڭا ءارى تابيعي ونىمدەرمەن قامتاماسىز ەتىپ قانا قويماي، جەرگىلىكتى ەكونوميكانىڭ دامۋىنا دا سەرپىن بەرەدى.
سونىمەن قاتار، جوبا اياسىندا تاعام پورتسيالارىن ساۋاتتى جوسپارلاۋ جانە ماۋسىمدىق ءمازىر ەنگىزىلەدى. بۇل تاعام قالدىقتارىن 25%-عا دەيىن ازايتۋعا مۇمكىندىك بەرەدى. وسىلايشا، باستاما بالالاردىڭ دۇرىس تاماقتانۋ ادەتىن قالىپتاستىرۋمەن قاتار، مەكتەپتەر مەن جەرگىلىكتى وندىرۋشىلەر اراسىندا تۇراقتى ارىپتەستىك مودەلىن جاساۋعا ىقپال ەتەدى.
بۇلاندى اۋدانىنداعى جوبانىڭ تابىستى جۇزەگە اسىرىلۋى بۇل تاجىريبەنى ەلىمىزدىڭ باسقا وڭىرلەرىنە كەڭەيتۋگە نەگىز بولماق. بۇل – ءوسىپ كەلە جاتقان ۇرپاقتىڭ دەنساۋلىعىن جاقسارتۋعا باعىتتالعان ءتيىمدى ءارى قولجەتىمدى مەكتەپ تاماقتانۋىن دامىتۋدىڭ وزىق ۇلگىسى.
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز