سەنبى كۇنى فينليانديانىڭ وڭتۇستىك-باتىسىنداعى ەۋرا قالاسىنىڭ ماڭىندا ەكى ازاماتتىق تىكۇشاق سوقتىعىسىپ، اپات سالدارىنان بورتتا بولعان بەس ادامنىڭ ءبارى قازا تاپتى، لەپ حابارلايدى "ادىرنا" ۇلتتىق پورتالى.
وقيعا جەرگىلىكتى ۋاقىت بويىنشا شامامەن 12:35-تە بولعان. كۋاگەرلەردىڭ ايتۋىنشا، تىكۇشاقتاردىڭ ءبىرى مانەۆر جاساپ جاتقان ساتتە ەكىنشىسىنە سوقتىعىسقان. سونىڭ سالدارىنان ەكەۋى دە جەرگە قۇلاعان. تىكۇشاقتار شامامەن 100 مەتر قاشىقتىقتا تابىلعان.
اپات سالدارىنان ءبىر تىكۇشاقتاعى ەكى، ەكىنشىسىندەگى ءۇش ادام كوز جۇمعان. باق دەرەكتەرىنە سايكەس، قازا تاپقانداردىڭ اراسىندا ەكى ەستوندىق كاسىپكەر بار.
تىكۇشاقتاردىڭ ءبىرى ەستونيادا، ەكىنشىسى اۋستريادا تىركەلگەنى بەلگىلى بولدى. ەكەۋى دە تالليننەن ۇشىپ شىعىپ، فينلياندياداعى كۋمو اەرودرومىنا بەت العان.
قايعىلى وقيعانىڭ سەبەپتەرى مەن ءمان-جايلارىن فينليانديانىڭ ءتيىستى ورگاندارى تەرگەپ جاتىر.
