كوكشەتاۋ قالاسىنىڭ №8 ورتا مەكتەپتىڭ 10-سىنىپ وقۋشىسى ەگور مەنگۋلوۆ سوچي قالاسىندا (رەسەي) 2025 جىلعى 10–17 مامىر ارالىعىندا وتكەن بيولوگيا ءپانى بويىنشا اشىق حالىقارالىق وليمپيادادا (Open International Biology Olympiad, OIBO) كۇمىس جۇلدەگەر اتاندى. سونىمەن قاتار، ول قازاقستان قۇراماسىنىڭ كوماندالىق جوبالىق تۋرداعى جەڭىسىنە دە ءوز ۇلەسىن قوستى.
وليمپياداعا 14 ەلدەن كەلگەن جاس بيولوگتار قاتىسىپ، ءۇش كەزەڭ بويىنشا باق سىنادى: تەوريالىق، جەكە پراكتيكالىق جانە كوماندالىق جوبالىق تۋر. بيىل العاش رەت ەنگىزىلگەن جوبالىق تۋردا دا قازاقستان كومانداسى جوعارى ناتيجە كورسەتتى.
جالپى قورىتىندى بويىنشا ەلىمىزدىڭ جاسوسپىرىمدەرى 2 التىن، 4 كۇمىس مەدال جەڭىپ الىپ، كوماندالىق ەسەپتە جەڭىسكە جەتتى.
ەگور مەنگۋلوۆتىڭ جەتىستىگى – تەك ءوزى وقيتىن مەكتەپ پەن تۋعان قالاسى كوكشەتاۋ ءۇشىن عانا ەمەس، بۇكىل اقمولا وبلىسى ءۇشىن ۇلكەن ماقتانىش. ونىڭ بۇل تابىسى – ەلىمىزدەگى مەكتەپ وقۋشىلارىنىڭ جوعارى دەڭگەيدە دايىندالىپ جاتقانىن جانە وڭىرلىك مەكتەپتەردىڭ الەۋەتىن دالەلدەيدى.
قازاقستان قۇراماسى وليمپيادا الدىندا «سيريۋس» ءبىلىم بەرۋ ورتالىعىندا ۇيىمداستىرىلعان ون كۇندىك وقۋ-جاتتىعۋ جيىنىنا قاتىسىپ، تاجىريبەلى ۇستازداردىڭ جەتەكشىلىگىمەن دايىندىق جۇرگىزدى. قۇرامانىڭ جەتەكشىسى – رەسپۋبليكالىق «دارىن» عىلىمي-پراكتيكالىق ورتالىعى ديرەكتورىنىڭ ورىنباسارى ايگۇل اكيمگەرەەۆنا قارقۋلوۆا.
ەگوردى جانە قازاقستان قۇراماسىن وسى زور جەتىستىگىمەن قۇتتىقتايمىز! الداعى ۋاقىتتا دا بيىك بەلەستەردى باعىندىرا بەرۋلەرىڭە تىلەكتەسپىز!
