جەلىدە نازارباەۆتار اۋلەتىنىڭ قورىمىندا جاڭادان پايدا بولعان بەيىتكە قاتىستى سۇراققا جەرگىلىكتى اكىمدىك جاۋاپ بەردى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەمە جاساپ.
بۇعان دەيىن جاڭا بەيىتتە سارا نازارباەۆا جەرلەنگەن بولۋى مۇمكىن دەگەن اقپارات تاراعان ەدى.
اكىمدىكتىڭ مالىمدەۋىنشە، شامالعان اۋىلىنداعى نازارباەۆتار اۋلەتىنىڭ قورىمىنا 2024 جىلدىڭ جەلتوقسان ايىندا قايتىس بولعان "باسقا ادام" جەرلەنگەن. بىراق اكىمدىك "باسقا ادام" كىم ەكەنىن ايتپاعان.
"جەرلەۋ ءدىني عۇرىپتار مەن داستۇرلەرگە سايكەس جۇرگىزىلدى. قازىرگى ۋاقىتتا قابىردە جازۋ مەن كورسەتكىش تاقتا ورناتىلماعان، الايدا مارقۇمنىڭ تۋىستارىنىڭ ايتۋىنشا، تاقتا جاقىن ارادا قويىلادى", – دەلىنگەن اكىمدىك جاۋابىندا.
سونىمەن قاتار، پرەزيدەنت ءىس باسقارماسى مەديتسينالىق ورتالىعىنىڭ ۇلتتىق گوسپيتالى سارا نازارباەۆانىڭ قايتىس بولعانى تۋرالى اقپارات شىندىققا سايكەس كەلمەيتىنىن تاعى دا راستادى. ولاردىڭ ايتۋىنشا قازىرگى تاڭدا ول ۇلتتىق گوسپيتالدە ەم قابىلداپ جاتىر.
اتالعان گوسپيتالدا ناۋقاستىڭ دياگنوزى مەن دەنساۋلىعى جايلى مالىمەتتەر دارىگەرلىك قۇپياعا جاتاتىنى ەسكەرتىلدى.
"مالىمەت تاراتپاۋ تۋرالى شەشىم پاتسيەنتتىڭ جەكە ومىرىنە قۇرمەتپەن قاراۋ، ەمدەۋ پروتسەسىنە كەدەرگى كەلتىرمەۋ جانە ونىڭ زاڭدى قۇقىعىن ساقتاۋ ماقساتىندا قابىلداندى", – دەپ ناقتىلادى ۇلتتىق گوسپيتال وكىلدەرى.
ەسكە سالا كەتەيىك، 14 مامىر كۇنى سارا نازارباەۆانىڭ قايتىس بولعانى ايتىلعان ەدى. الايدا بۇل اقپاراتتى نۇرسۇلتان نازارباەۆتىڭ ءباسپاسوز حاتشىسى ايدوس ۇكىباي رەسمي تۇردە جوققا شىعاردى.
