رەسەيلىك «ينتەكو گرۋپپ» ەنەرگەتيكالىق كومپانياسى اۋعانستاندا مۇناي ءوندىرۋ جانە مۇناي وڭدەۋ زاۋىتىن ء(موز) cالۋ بويىنشا «تاليبان» قوزعالىسىنىڭ وكىلدەرىمەن كەلىسىمگە كەلدى، دەپ حابارلايدى "ادىرنا" ۇلتتىق پورتالى ريا نوۆوستي-عا سىلتەمە جاساپ.
كەلىسىمشارت قازان قالاسىندا وتكەن 16-شى حالىقارالىق ەكونوميكالىق فورۋم بارىسىندا «تاليبان» ۋاقىتشا ۇكىمەتىنىڭ ونەركاسىپ جانە ساۋدا ءمينيسترى مىندەتىن اتقارۋشى نۇرۋددين ازيزي مەن «ينتەكو گرۋپپ» وكىلدەرى اراسىندا جاسالدى.
«كومپانيا ماماندارى اۋعانستان اۋماعىندا گەولوگيالىق بارلاۋ جۇمىستارىن جۇرگىزىپ قويدى. ەندى بۇرعىلاۋ جۇمىستارىنا كىرىسۋدى جوسپارلاپ وتىر. سونىمەن قاتار، تاڭدالعان جەردە مۇناي وڭدەۋ زاۋىتىن سالۋ قاتار جۇرەدى. بۇل ورىن قاجەتتى ينجەنەرلىك ينفراقۇرىلىممەن جابدىقتالعان»، – دەدى اۋعانستانداعى رەسەيلىك ىسكەرلىك وكىلدىكتىڭ باسشىسى رۋستام حابيبۋللين.
مۇناي ءوندىرۋ جونىندەگى كەلىسىمنەن بولەك، فورۋمدا «تاليبان» وكىلدەرى مەن رەسەيلىك كاسىپكەرلەر كولىك، اۆياتسيا جانە ساۋدا سالالارىنداعى ىنتىماقتاستىققا قاتىستى تاعى بەس ءوزارا تۇسىنىستىك تۋرالى مەموراندۋمعا قول قويدى. الايدا بۇل قۇجاتتاردىڭ ەگجەي-تەگجەيى جاريا ەتىلگەن جوق.
سونداي-اق، نۇرۋددين ازيزي رەسەيلىك كومپانيالاردى اۋعانستانداعى كەن ءوندىرىسى مەن ەلەكتر ستانتسيالارىن سالۋعا ينۆەستيتسيا سالۋعا شاقىردى.
فورۋمعا قاتىسقان دەلەگاتسيانى باسقارعان «تاليبان» ۇكىمەتى ەكونوميكا ءمينيسترىنىڭ ورىنباسارى ابدۋل عاني بارادار تاتارستان پرەزيدەنتى رۋستام ميننيحانوۆپەن جانە موردوۆيا باسشىسى ارتيوم زدۋنوۆپەن كەزدەسكەنىن مالىمدەدى. ونىڭ ايتۋىنشا، كەلىسسوزدەردە اۋىل شارۋاشىلىعى جانە ونەركاسىپ ونىمدەرىن ەكسپورتتاۋ، كەدەن ماسەلەلەرى جانە ەكىجاقتى ساۋدانى وڭتايلاندىرۋ شارالارى تالقىلانعان.
«بۇل فورۋم ءبىزدىڭ ەكونوميكالىق قارىم-قاتىناسىمىزدا جاڭا كەزەڭنىڭ باستالعانىن كورسەتتى»، – دەدى بارادار دەلەگاتسيا ساپارىنىڭ قورىتىندىسى بويىنشا.
"تاليبان" - رەسەيدە جانە باسقا دا بىرنەشە ەلدە ۇزاق جىل تىيىم سالىنىپ كەلگەن ساياسي قوزعالىس. سوڭعى جىلدارى تالىپتەردى تەرروريستىك ۇيىمدار تىزىمىنەن شىعارۋ ءۇردىسى بايقالادى. ولاردىڭ اراسىندا رەسەي دە بار.
