قازاقستاندا العاشقى اتوم ەلەكتر ستانتسياسى الماتى وبلىسى جامبىل اۋدانىنا قاراستى ۇلكەن كەنتىندە سالىناتىنى ۇكىمەت قاۋلىسىمەن بەكىتىلگەن. اتالعان ەلدى مەكەن بالقاش كولىنىڭ جاعالاۋىندا ورنالاسقان. ەنەرگەتيكا سالاسىنىڭ ماماندارى بۇل ورىندى تاڭداۋدى وڭتۇستىك وڭىرلەرگە ەلەكتر قۋاتىن جەتكىزۋدىڭ ىڭعايلىلىعىمەن جانە اەس تۋربينالارىن سالقىنداتۋعا قاجەتتى سۋ رەسۋرستارىنىڭ جاقىن بولۋىمەن تۇسىندىرەدى.
الايدا بالقاش كولىنىڭ باستى سۋ كوزى – ىلە وزەنى. بۇل وزەننىڭ باستاۋى قىتاي اۋماعىندا جاتقاندىقتان، حالىقارالىق نورمالارعا سايكەس، ترانسشەكارالىق وزەندەردە ءىرى ينفراقۇرىلىم سالۋ ءۇشىن سۋ بولىسەتىن ەلدەردىڭ كەلىسىمى قاجەت.
وسىعان بايلانىستى، «قازاقستان اتوم ەلەكتر ستانتسيالارى» جشس باس ديرەكتورىنىڭ ورىنباسارى رينات وقاسوۆ قىتاي تاراپىمەن كەلىسىم تۋرالى سۇراققا تۇسىنىكتەمە بەردى.
«قازاقستان اتوم ەنەرگەتيكاسى سالاسىندا بارلىق حالىقارالىق كونۆەنتسيالارعا مۇشە. قازىرگى ۋاقىتتا اەس قۇرىلىسىنا ۇمىتكەر كومپانيالار قاتارىندا قىتاي كورپوراتسياسى دا بار. سوندىقتان ىلە وزەنى بويىنشا قىتايمەن ناقتى كەلىسسوز جۇرگىزگەن جوقپىز، بىراق بۇل ماسەلەدە ايتارلىقتاي قيىندىق تۋىندايدى دەپ ويلامايمىن»، – دەدى ول.
