«جاس قۇتقارۋشى»: قاۋىپسىزدىككە العاشقى قادام

2025 جىلدىڭ 20–22 مامىر كۇندەرى ارالىعىندا باتىس قازاقستان وبلىستىق بالالار مەن جاسوسپىرىمدەر تۋريزم جانە ەكولوگيا ورتالىعىنىڭ «ەۆرازيا» تۋريستىك كەشەنىندە وبلىستىق «جاس قۇتقارۋشى» سلەتى وتۋدە. اتالعان ءىس-شارانى ۇيىمداستىرۋشىلار – باتىس قازاقستان وبلىسىنىڭ ءبىلىم باسقارماسى، توتەنشە جاعدايلار دەپارتامەنتى جانە وبلىستىق تۋريزم جانە ەكولوگيا ورتالىعى. سلەتتىڭ باستى ماقساتى – جالپى ورتا ءبىلىم بەرەتىن مەكتەپ وقۋشىلارىن جان-جاقتى دامىتۋ، ولاردىڭ توتەنشە جاعدايلار كەزىندەگى ءىس-قيمىلدارعا دايىندىقتارىن ارتتىرۋ جانە ازاماتتىق جاۋاپكەرشىلىك پەن كوماندالىق رۋحتى قالىپتاستىرۋ. سلەتكە وبلىستىڭ اۋداندىق (قالالىق) كەزەڭدەرىندە وزا شاپقان جاسوسپىرىمدەر – 15-17 جاس ارالىعىنداعى مەكتەپ وقۋشىلارى قاتىسۋدا. ءار اۋدان مەن قالادان كەلگەن كوماندالار قۇرامىندا 10 قاتىسۋشى بار: 5 ۇل، 1 قىز بالا مىندەتتى تۇردە، سونداي-اق قوسىمشا 1 ۇل مەن 1 قىزدان قۇرالعان توپ پەن 2 ەرەسەك (جاتتىقتىرۋشى مەن كوماندا جەتەكشىسى). سلەت بارىسىندا قاتىسۋشىلار ءتۇرلى جارىستار مەن جاتتىعۋلارعا قاتىسادى. ولاردىڭ ىشىندە – العاشقى مەديتسينالىق كومەك كورسەتۋ، تابيعي جانە تەحنوگەندىك سيپاتتاعى توتەنشە جاعدايلار كەزىندەگى ءىس-ارەكەتتەر، قۇتقارۋ وپەراتسيالارى، تۋريستىك كەدەرگىلەردەن ءوتۋ سياقتى تاپسىرمالار بار. بۇل جاتتىعۋلار جاس جەتكىنشەكتەردىڭ توزىمدىلىگىن، ەپتىلىگىن، زەيىندىلىگى مەن شۇعىل شەشىم قابىلداۋ قابىلەتتەرىن دامىتۋعا باعىتتالعان. وسىنداي فورماتتاعى سلەتتەر وقۋشىلاردىڭ فيزيكالىق جانە پسيحولوگيالىق دايىندىعىن ارتتىرىپ قانا قويماي، ومىرلىك ماڭىزى بار داعدىلاردى مەڭگەرۋگە مۇمكىندىك بەرەدى. «جاس قۇتقارۋشى» – بۇل تەك جارىس ەمەس، بۇل – ەرتەڭگى قاۋىپسىز قوعامدى قالىپتاستىراتىن، جاۋاپتى دا باتىل ازاماتتاردى تاربيەلەۋ الاڭى.