ۇلتتىق قۇرىلتاي قۇرامىنا وزگەرىس ەنگىزىلدى

ۇلتتىق قۇرىلتاي قۇرامىندا روتاتسيا بولدى. بۇل تۋرالى اقوردا ءمالىم ەتتى، دەپ حابارلايدى «ادىرنا» ءتىلشىسى. ۇلتتىق قۇرىلتايدىڭ جۇمىسىنا قوعام وكىلدەرى – قازاقستاننىڭ ەڭبەك ەرى، قىزىلوردا وبلىسى قوعامدىق كەڭەسىنىڭ مۇشەسى يمامزادا شاعىرتاەۆ، قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل قانات نۇروۆ، پاۆلودار وبلىسى قوعامدىق كەڭەسىنىڭ مۇشەسى باقىت بەكسەيىتوۆا جانە ماتەماتيك، قازاقستان رەسپۋبليكاسى پرەزيدەنتىنىڭ جانىنداعى ۇلتتىق عىلىم اكادەمياسىنىڭ اكادەميگى دۇرۆۋدحان سۇراعان تارتىلدى. سونداي-اق روتاتسيا اياسىندا ۇلتتىق قۇرىلتاي قۇرامىنان لەۆ تاراكوۆ (قايتىس بولۋىنا بايلانىستى), باۋىرجان قانيەۆ، قىلىشباي بيسەنوۆ، ايگۇل ورىنبەك، سەرىك سادvاقاسوۆ جانە ماقسات جاباعين شىعارىلدى. قوعام بەلسەندىسى ايگۇل ورىنبەك الەۋمەتتىك جەلىدەگى پاراقشاسىندا حالىقتىڭ سەنىمىن ارقالاپ ءجۇرۋدىڭ ۇلكەن جاۋاپكەرشىلىك ەكەنىن جەتكىزدى. «ءيا، يىعىمنان اۋىر جۇك ءتۇستى! حالىقتىڭ سەنىمىن ارقالاپ ءجۇرۋ — قۇر ءسوز ەمەس، بۇل — ۇلكەن جاۋاپكەرشىلىك. 2019 جىلى پرەزيدەنت قاسىم-جومارت توقاەۆ ۇلتتىق قوعامدىق سەنىم كەڭەسىن قۇردى. سول كەزدە مەنى قوعامدا ازاماتتىق ۇستانىمىن اشىق ايتىپ جۇرگەن بەلسەندى قايراتكەر رەتىندە كەڭەس قۇرامىنا شاقىردى. جاي وتىرعان جوقپىن. ءۇنسىز قالعان جوقپىن. اۋىل-ايماقتىڭ شىنايى ماسەلەلەرىن اشىق ايتىپ، وڭىرلەردەگى تۇيتكىلدى تۇيىندەردى تىك كوتەردىم. بىرقاتار ۇسىنىستارىم مەملەكەت باسشىسىنىڭ تاراپىنان قولداۋ تاپتى. بۇل — مەن ءۇشىن عانا ەمەس، ەل ءۇشىن جاسالعان يگى ءىس بولدى»،—دەدى ول.