بۇگىن، 21 مامىر كۇنى تالعاردا كىسى قولىنان قازا تاپقان 16 جاستاعى شەرزات پولاتتىڭ سوتىندا نەگىزگى ايىپتالۋشى ابزال شىناسىلدان جاۋاپ الۋ باستالدى، دەپ حابارلايدى «ادىرنا» ءتىلشىسى.
ول سوت وتىرىسىندا ءوزىن فوتو-ۆيدەوعا تۇسىرۋگە قارسىلىق بىلدىرمەدى.
ايىپتالۋشى توبەلەسكە قاتىسقانداردىڭ تەرگەۋ الدىندا ءوزارا كەلىسىمگە كەلگەندەرىن جەتكىزدى.
«قىلمىستى موينىما العان سەبەبىم بار. تالعاردا پوليتسيا باسقارماسىندا بولعاندا تەرگەۋشىلەر ء"بىر ادام ىستەدى، ءبىر ادام موينىنا السىن. ايتپەسە، بارىڭە قيىن بولادى. ۇيىمداسقان قىلمىستىق توپ رەتىندە كەتەسىڭدەر" دەدى. سونىمەن ءبىزدى قوناەۆ قالاسىنا كەزەك-كەزەگىمەن الىپ كەتەتىن بولدى. گازەلمەن الىپ كەتىپ بارا جاتقاندا راۆيل ساكيەۆ، شىڭعىس بەلعوجاەۆ، ازامات توقتاۋباەۆ تورتەۋىمىز سويلەستىك. سول كەزدە راۆيل ساكيەۆ "بۇنى بىرەۋ ىستەدى، مويىنداسىن. ايتپەسە بارىمىزگە قيىن بولادى" دەپ ايتتى. سول كەزدە مەندە پىشاق بولعاننان كەيىن، ءوزىمدى قىلمىس جاسامادىم دەپ، جاسىرعانداي بولمايىن دەدىم. ىشتەي مەن السام، الا سالايىن دەگەن وي بولدى. قاپشاعايداعى تەرگەۋ يزولياتورىنا اپارماي تۇرىپ، باسىمىز قوسىلىپ، سويلەسىپ ۇلگەرىپ قالدىق. مۇندا تاعى نۇربول توقتاۋباەۆ ماعان "سەندە پىشاق بولدى عوي" دەگەندە، مەن وعان "شەرزاتتى، مەن موينىما الامىن" دەپ بىردەن ايتتىم. ال نۇرقاناتتىڭ جامباسىنا تىعىلعان پىشاقتى شىڭعىس تىقتى دەپ كەلىسكەن دەدىك. پوليتسيا دەپارتامەنتىندە دە وسى كەلىسكەندەگىدەي ايتىپ بەردىك. تەرگەۋشىگە دە وسىلاي ايتتىم»،– دەدى شىناسىل.
ال شەرزاتقا ناقتى كىمنىڭ پىشاق سالعانىن بىلمەيتىنىن جەتكىزدى. سونداي-اق ول نۇرقانات عايىپباەۆقا پىشاق ۇرعانىن مويىندادى.
«بارسام ەكپەتىنەن جاتتى. قۇيمىشاعى اشىق جاتىر ەكەن. سودان پىشاقتى ەكى-ءۇش سانتيمەتر ەتىپ ۇستاپ، جامباسىنان ۇرىپ جىبەردىم. ءبارى كەتتىك-كەتتىك دەدى، سوسىن كەتىپ قالدىق»،– دەدى ول.
