بەلگىلى جازۋشى مۇحتار ماعاۋيننىڭ «تازىنىڭ ءولىمى» پوۆەسىنىڭ جەلىسى بويىنشا فيلم تۇسىرۋگە ستسەناريستەر تاراپىنان بىردە-ءبىر ءوتىنىم تۇسپەدى. بۇل تۋرالى مادەنيەت جانە اقپارات مينيسترلىگى «قازاقپارات» ساۋالىنا بەرگەن جاۋابىندا ايتتى، دەپ حابارلايدى «ادىرنا» ءتىلشىسى.
«سەنات دەپۋتاتى بيبىگۇل جەكسەنبايدىڭ ۇسىنىسى نەگىزىندە مۇحتار ماعاۋيننىڭ «تازىنىڭ ءولىمى» شىعارماسى جەلىسىمەن فيلم ءتۇسىرۋ ءۇشىن قولايلى ستسەناريلەردى ىرىكتەۋ جۇمىستارى بارىسىندا ءتيىستى ستسەناري كەلىپ تۇسپەگەندىگىن حابارلايمىز. بۇدان بولەك، مينيسترلىك 2026 جىلعى باسىم تاقىرىپتاردىڭ قاتارىنا «ۇلتتىق قۇندىلىق. تازى» تاقىرىبىن قوسۋ مۇمكىندىگىن قاراستىرادى»،—دەدى مينيسترلىك.
ال بيىلعا بەكىتىلگەن باسىم تاقىرىپتار مىنانداي:
- ويىن فيلمدەرى سەكتسياسى - «قورشاعان ورتا، تابيعاتتى قورعاۋ»، «وتان، تۋعان جەرگە دەگەن سۇيىسپەنشىلىك»، «تاريح پەن تاعىلىم»، «قازاق ەرتەگىلەرى مەن ەپوستارى»، «بالالارعا ارنالعان فيلمدەر»، «اۋىل تىرشىلىگى»;
- انيماتسيالىق فيلمدەر سەكتسياسى – «ۇلتتىق قۇندىلىقتار»، «تۋعان جەردىڭ كوركەم تابيعاتى»، «اتا-اناعا قۇرمەت»، «ادال ازامات»;
- دەرەكتى، ونىڭ ىشىندە حرونيكالىق فيلمدەر سەكتسياسى – «ەل بىرلىگى»، «تاريحتاعى ەلەۋلى وقيعالار»، «عىلىمي جەتىستىك».
ەسكە سالايىق، بۇعان دەيىن پرەمەر-مينيستر ولجاس بەكتەنوۆ «تازىنىڭ ءولىمى» پوۆەسىنىڭ جەلىسى بويىنشا فيلم تۇسىرىلەتىنىن ايتقان ەدى.