اقمولا وبلىسىندا كاسىپكەرلىكتى قولداۋ جانە بيزنەستى جۇرگىزۋگە قولايلى جاعداي جاساۋ بويىنشا جۇيەلى جۇمىس جۇرگىزىلۋدە. نەگىزگى ماقساتتار – قارجىعا قولجەتىمدىلىكتى جەڭىلدەتۋ، بيۋروكراتيانى ازايتۋ جانە ءوندىرىستى قولداۋ.
2025 جىلى شاعىن جانە ورتا بيزنەستى تۇراقتى قولداۋ ءۇشىن وبلىستىق بيۋدجەتتەن «دامۋ» قورى ارقىلى نەسيە پايىزدارىن سۋبسيديالاۋ ماقساتىندا 2 ملرد تەڭگە ءبولىندى. ونىڭ 300 ملن تەڭگەسى قوسىمشا قاراجات رەتىندە قاراستىرىلدى. بۇل كاسىپكەرلەرگە نەسيەنى وڭاي الۋ مۇمكىندىگىن بەرىپ، قارجىلاندىرۋ باعدارلامالارىنا تۇراقتى قاتىسۋىنا جاعداي جاسادى.
وسىنىڭ ناتيجەسىندە بيزنەستە وندىرىلگەن ءونىمنىڭ جالپى كولەمى 2 ترلن تەڭگەگە جۋىقتاپ، 185 ملرد تەڭگە سالىق تولەنىپ، 7 مىڭنان استام جاڭا جۇمىس ورنى اشىلدى.
ارنايى ماڭىزدى باعدارلاما – «كەڭ دالا – 2» شەڭبەرىندەگى جەڭىلدەتىلگەن نەسيە. وسى جوبا اياسىندا ءوڭىردىڭ اگرارلىق سەكتورىنا 100 ملرد تەڭگەدەن استام قارجى بەرىلدى. قارجىلاندىرۋ 2024 جىلعى جەلتوقساندا باستالىپ، ەگىس ناۋقانىنا ۋاقتىلى دايىندالۋعا جانە ۋاقىتىلى ەگۋگە مۇمكىندىك تۋدىردى.
«جەڭىلدەتىلگەن نەسيە – ناتيجە ءۇشىن ەڭبەك ەتەتىندەرگە مۇمكىندىك. مەملەكەت قولداۋ كورسەتەدى، ال بيزنەس ونى ءتيىمدى پايدالانۋعا ءتيىس»، – دەدى وبلىس اكىمى مارات احمەتجانوۆ كاسىپكەرلەرمەن كەزدەسۋدە.
