ەۋروپالىق وداق رەسەيگە قارسى 17-ءشى سانكتسيالار پاكەتى اياسىندا وزبەكستانداعى Trade Engine System كومپانياسىن قارا تىزىمگە ەنگىزدى. سانكتسيالار ءتىزىمى ەو-نىڭ رەسمي سايتىندا جاريالاندى، دەپ حابارلايدى «ادىرنا» ءتىلشىسى.
Trade Engine System كومپانياسى ەلەكتروندىق جانە تەلەكوممۋنيكاتسيالىق جابدىقتار مەن قوسالقى بولشەكتەردىڭ كوتەرمە ساۋداسىمەن اينالىسادى. كومپانيا 2022 جىلى تىركەلگەن. ونىڭ باسشىسى جانە قۇرىلتايشىسى رەتىندە ناسيرجان اكباروۆ كورسەتىلگەن.
بۇل — ەۋروپالىق وداق سانكتسيا ەنگىزگەن وزبەكستانداعى بەسىنشى ۇيىم. بۇعان دەيىن Alfa Beta Creative LLC, GFK Logistics Asia LLC, Mvizion LLC, UZSTANEX LLC كومپانيالارى قارا تىزىمگە ەنگەن ەدى.
سونداي-اق سانكتسيالار تىزىمىندە قازاقستاندىق ءتورت كومپانيا بار.
ايتا كەتەيىك، 17-ءشى سانكتسيالار پاكەتىنە رەسەي، وزبەكستان، بەلارۋس، قىتاي، تۇركيا، ءباا، سەربيا جانە ۆەتنام ەلدەرىنەن 75 جەكە جانە زاڭدى تۇلعا ەنگەن.
