ستەپنوگورسك قالاسىندا 1000 ورىندىق جاڭا جالپى ءبىلىم بەرەتىن مەكتەپ پەن كوپفۋنكتسيونالدى سپورت كەشەنىنىڭ قۇرىلىسى باستالماق. بۇل ماڭىزدى الەۋمەتتىك جوبالار اقمولا وبلىسىنىڭ اكىمى مارات احمەتجانوۆتىڭ باستاماسىمەن جۇزەگە اسىرىلۋدا. قۇرىلىسقا قاتىستى مەموراندۋمعا ستەپنوگورسك قالاسىنىڭ اكىمدىگى مەن «اك التىنالماس» اكتسيونەرلىك قوعامى قول قويدى.
قۇجاتقا قول قويۋ راسىمىندە ءوڭىر باسشىسى جوبالاردىڭ ماڭىزدىلىعىنا توقتالىپ، الەۋمەتتىك ارىپتەستەرگە ريزاشىلىعىن ءبىلدىردى.
"بۇل ءوڭىر ءۇشىن ماڭىزدى ءارى وزەكتى جوبالار. سپورت سارايى تۇرعىندار ءۇشىن دەنە شىنىقتىرۋمەن اينالىسۋ عانا ەمەس، وڭىرلىك جانە رەسپۋبليكالىق دەڭگەيدەگى جارىستار وتەتىن زاماناۋي الاڭعا اينالادى. مەملەكەت باسشىسى اتاپ وتكەندەي، ساپالى ءبىلىم مەن سپورتقا قولجەتىمدىلىك – زياتكەر ءارى دەنى ساۋ ۇرپاق قالىپتاستىرۋدىڭ نەگىزگى ىرگەتاسى", – دەدى مارات احمەتجانوۆ.ءوز كەزەگىندە «اك التىنالماس» اق باسقارما توراعاسى بالامير ماحانوۆ كومپانيا اتىنان قۇرىلىس جۇمىستارىن ساپالى جانە ۋاقىتىلى ورىنداۋعا تولىق دايىن ەكەندەرىن جەتكىزدى.
"بۇل – وڭىردەگى ەڭ ءىرى جانە اۋقىمدى جوبالارىمىزدىڭ ءبىرى. بيزنەس رەتىندە الەۋمەتتىك جاۋاپكەرشىلىكتى سەزىنە وتىرىپ، حالىقتىڭ يگىلىگىنە باعىتتالعان باستامالارعا ارقاشان ۇلەس قوسۋعا دايىنبىز. بۇل نىسانداردى سالۋدا كومپانيانىڭ تاجىريبەسى، رەسۋرستارى جانە ەڭ ۇزدىك جوبالىق شەشىمدەرى پايدالانىلاتىن بولادى، – دەدى ول.جالپى ەكى جوبانىڭ قۇنى 22 ميلليارد تەڭگەنى قۇرايدى. كومپانيا وكىلدەرىنىڭ ايتۋىنشا، سپورت سارايىنىڭ جوبالىق-سمەتالىق قۇجاتتاماسى ءازىر جانە قۇرىلىسقا ارنالعان جەر تەلىمى دە دايىن. سول سەبەپتى قۇرىلىس جۇمىستارى الداعى كۇندەرى باستالىپ، سپورت كەشەنى كەلەر جىلى پايدالانۋعا بەرىلمەك. جاڭا نىساندا امبەباپ زال، باسسەين، ترەناجەر جانە ارنايى سپورت زالدارى، سونداي-اق جاتتىعۋ مەن جارىس وتكىزۋگە قاجەتتى ينفراقۇرىلىم قاراستىرىلعان. ال 2027 جىلعى 1 قىركۇيەكتە ستەپنوگورسك قالاسىنىڭ وقۋشىلارى 1000 ورىندىق جاڭا مەكتەپ تابالدىرىعىن اتتايدى. زامان تالابىنا ساي سالىناتىن ءبىلىم ورداسىندا زاماناۋي وقۋ كابينەتتەرى، IT-ورتالىق، سپورت زالى، مۋلتيمەديالىق ايماقتار مەن جايلى ءبىلىم بەرۋ كەڭىستىگى قاراستىرىلعان. بۇل جوبالار – ءوڭىردىڭ الەۋمەتتىك ينفراقۇرىلىمىن نىعايتىپ، جاستاردىڭ ساپالى ءبىلىم مەن سپورتقا قولجەتىمدىلىگىن قامتاماسىز ەتەتىن ماڭىزدى قادام. فوتو: el.kz
