اقمولا وبلىسىنىڭ زەرەندى اۋدانىندا بالالار مەن جاسوسپىرىمدەردىڭ شىعارماشىلىق الەۋەتىن دامىتۋعا باعىتتالعان جاڭا ونەر ورتالىعى اشىلدى. بۇل ورتالىق وسكەلەڭ ۇرپاقتىڭ ونەرگە دەگەن قىزىعۋشىلىعىن ارتتىرىپ، جان-جاقتى دامۋىنا مۇمكىندىك بەرەدى.
مۇندا وقۋشىلار تەك قاعاز قالدىقتارىن قايتا وڭدەپ، قولدان بۇيىمدار جاساۋمەن عانا شەكتەلمەيدى، سونىمەن قاتار ۆوكال، حورەوگرافيا، تەاتر جانە بەينەلەۋ ونەرى باعىتتارى بويىنشا دا ءوز قابىلەتتەرىن شىڭداي الادى. بالالار بىرنەشە ۇيىرمەگە قاتار قاتىسا الادى. ماسەلەن، ادەمي-اي امانباي ەسىمدى وقۋشى دومبىرا، سۋرەت سالۋ، بي، قولونەر جانە تەاتر ۇيىرمەلەرىنە قاتىسىپ ءجۇر. بۇل – ولاردىڭ جان-جاقتى دامۋىنا زور ىقپال ەتەدى.
بالالار مەن جاسوسپىرىمدەر شىعارماشىلىعى ورتالىعىنىڭ ديرەكتورى باقىتبەك سەيداحمەتوۆتىڭ ايتۋىنشا، جاڭا وقۋ جىلى باستالعاندا قوسىمشا 10 مامان قاجەت بولادى. قازىرگى تاڭدا ورتالىقتا 700-گە جۋىق بالا ءبىلىم الىپ جاتىر، الداعى ۋاقىتتا بۇل ساندى 1200–1300-گە دەيىن جەتكىزۋ جوسپارلانعان.
ونەر ورتالىعىمەن قاتار اۋدانداعى بالالار مۋزىكا مەكتەبى دە جاڭا عيماراتقا كوشتى. مەكتەپ ديرەكتورى گۇلشات مولداباەۆانىڭ ايتۋىنشا، بۇل – سوڭعى 23 جىلدا مەكتەپكە ارنايى بەرىلگەن العاشقى عيمارات. بۇعان دەيىن مەكتەپ ءارتۇرلى مەكەمەلەردىڭ بوس كابينەتتەرىن ۋاقىتشا پانالاپ كەلگەن. جاڭا عيمارات كەڭ، جارىق ءارى دىبىس وقشاۋلاۋ جۇيەسىمەن جابدىقتالعان، بۇل بالالاردىڭ جايلى جاعدايدا ءبىلىم الۋىنا مۇمكىندىك بەرەدى.
سونىمەن قاتار، اۋداندا شىعارماشىل جاندارعا ارنالعان كرەاتيۆتى حابتىڭ قۇرىلىسى باستالدى. بۇل – دارىندى جاستار مەن ونەرپازدار ءۇشىن ورتاق الاڭعا اينالماق. اتالعان نىساندى بيىلعى جىلدىڭ سوڭىنا دەيىن پايدالانۋعا بەرۋ جوسپارلانىپ وتىر.
سوڭعى جىلدارى اقمولا وبلىسىندا مادەنيەت سالاسىن دامىتۋعا ەرەكشە نازار اۋدارىلىپ كەلەدى. سوڭعى ءۇش جىل ىشىندە وڭىردە 100-دەن استام اۋىلدىق كلۋب جوندەلىپ، جاڭا مادەني نىساندار سالىندى. وسىلايشا، اۋىل تۇرعىندارىنىڭ مادەني جانە شىعارماشىلىق قىزمەتتەرگە قولجەتىمدىلىگى ارتىپ كەلەدى.
زەرەندى اۋدانىندا اشىلعان ونەر ورتالىعى مەن مۋزىكا مەكتەبى – بالالار مەن جاسوسپىرىمدەردىڭ شىعارماشىلىق قابىلەتىن دامىتۋ جولىنداعى ماڭىزدى قادام. بۇل باستامالار جاس ۇرپاقتىڭ ونەرگە دەگەن قىزىعۋشىلىعىن وياتىپ، ولاردىڭ تۇلعالىق جانە رۋحاني دامۋىنا سەرپىن بەرەدى.
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز