Zerendı audanynda balalar men jasöspırımderdıŋ şyǧarmaşylyǧyn damytatyn jaŋa öner ortalyǧy aşyldy

Aqmola oblysynyŋ Zerendı audanynda balalar men jasöspırımderdıŋ şyǧarmaşylyq äleuetın damytuǧa baǧyttalǧan jaŋa öner ortalyǧy aşyldy. Būl ortalyq öskeleŋ ūrpaqtyŋ önerge degen qyzyǧuşylyǧyn arttyryp, jan-jaqty damuyna mümkındık beredı. Mūnda oquşylar tek qaǧaz qaldyqtaryn qaita öŋdep, qoldan būiymdar jasaumen ǧana şektelmeidı, sonymen qatar vokal, horeografiia, teatr jäne beineleu önerı baǧyttary boiynşa da öz qabıletterın şyŋdai alady. Balalar bırneşe üiırmege qatar qatysa alady. Mäselen, Ademi-Ai Amanbai esımdı oquşy dombyra, suret salu, bi, qolöner jäne teatr üiırmelerıne qatysyp jür. Būl – olardyŋ jan-jaqty damuyna zor yqpal etedı. Balalar men jasöspırımder şyǧarmaşylyǧy ortalyǧynyŋ direktory Baqytbek Seidahmetovtyŋ aituynşa, jaŋa oqu jyly bastalǧanda qosymşa 10 maman qajet bolady. Qazırgı taŋda ortalyqta 700-ge juyq bala bılım alyp jatyr, aldaǧy uaqytta būl sandy 1200–1300-ge deiın jetkızu josparlanǧan. Öner ortalyǧymen qatar audandaǧy balalar muzyka mektebı de jaŋa ǧimaratqa köştı. Mektep direktory Gülşat Moldabaevanyŋ aituynşa, būl – soŋǧy 23 jylda mektepke arnaiy berılgen alǧaşqy ǧimarat. Būǧan deiın mektep ärtürlı mekemelerdıŋ bos kabinetterın uaqytşa panalap kelgen. Jaŋa ǧimarat keŋ, jaryq ärı dybys oqşaulau jüiesımen jabdyqtalǧan, būl balalardyŋ jaily jaǧdaida bılım aluyna mümkındık beredı. Sonymen qatar, audanda şyǧarmaşyl jandarǧa arnalǧan kreativtı habtyŋ qūrylysy bastaldy. Būl – daryndy jastar men önerpazdar üşın ortaq alaŋǧa ainalmaq. Atalǧan nysandy biylǧy jyldyŋ soŋyna deiın paidalanuǧa beru josparlanyp otyr. Soŋǧy jyldary Aqmola oblysynda mädeniet salasyn damytuǧa erekşe nazar audarylyp keledı. Soŋǧy üş jyl ışınde öŋırde 100-den astam auyldyq klub jöndelıp, jaŋa mädeni nysandar salyndy. Osylaişa, auyl tūrǧyndarynyŋ mädeni jäne şyǧarmaşylyq qyzmetterge qoljetımdılıgı artyp keledı. Zerendı audanynda aşylǧan öner ortalyǧy men muzyka mektebı – balalar men jasöspırımderdıŋ şyǧarmaşylyq qabıletın damytu jolyndaǧy maŋyzdy qadam. Būl bastamalar jas ūrpaqtyŋ önerge degen qyzyǧuşylyǧyn oiatyp, olardyŋ tūlǧalyq jäne ruhani damuyna serpın beredı.