ماكينسك قالاسىندا سۋ قۇبىرلارىن جاڭعىرتۋ جوباسى قارقىندى ءجۇرىپ جاتىر

ماكينسك قالاسىندا اۋقىمدى سۋ قۇبىرى جەلىلەرىن جاڭعىرتۋ جوباسىنىڭ ءبىرىنشى كەزەڭى بەلسەندى تۇردە جۇزەگە اسىرىلۋدا. قازىرگى تاڭدا ينجەنەرلىك جەلىلەردىڭ 76,7 شاقىرىمىن قامتيتىن جۇمىس كولەمىنىڭ 65 پايىزى ورىندالعان. سونىڭ ناتيجەسىندە 45 شاقىرىم جاڭا قۇبىر تارتىلدى. جوبا اياسىندا توزىعى جەتكەن سۋ قۇبىرلارى تولىعىمەن جاڭارتىلىپ، زاماناۋي ءارى سەنىمدى جۇيەلەرمەن اۋىستىرىلادى. جوسپار بويىنشا جالپى ۇزىندىعى 72,7 شاقىرىم جاڭا سۋ جەلىسى سالىنادى. جوبانىڭ جالپى قۇنى — 3 382,9 ميلليون تەڭگە. 2024 جىلدىڭ ىشىندە 2 017,5 ميلليون تەڭگە قارجى يگەرىلگەن. جىل سوڭىنا دەيىن تاعى 692,5 ميلليون تەڭگە قوسىمشا قاراجات ءبولىنۋى جوسپارلانعان. قۇرىلىس جۇمىستارىن «ۋنيۆەرسالسترويسەرۆيس» جشس جۇرگىزۋدە. كەلىسىمشارت بويىنشا جۇمىس قۇنى 3 279,9 ميلليون تەڭگەنى قۇرايدى. وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ حابارلاۋىنشا، بارلىق جۇمىستار بەلگىلەنگەن كەستە بويىنشا ءجۇرىپ جاتىر. قۇرىلىس جۇمىستارىن بيىلعى قاراشا ايىندا تولىق اياقتاۋ كوزدەلىپ وتىر. جوبا ىسكە قوسىلعان سوڭ ماكينسك قالاسىنداعى 18 مىڭنان استام تۇرعىن تۇراقتى جانە ورتالىقتاندىرىلعان اۋىز سۋمەن قامتىلادى. اتالعان جوبا حالىقتى تازا اۋىز سۋمەن قامتاماسىز ەتۋمەن قاتار، قالانىڭ سانيتارلىق جاعدايىن جاقسارتۋعا جانە تۇرعىنداردىڭ ءومىر ءسۇرۋ ساپاسىن ارتتىرۋعا ەلەۋلى ۇلەس قوسادى.