قازاقستان استاناسىندا رەسەيدىڭ اسكەري-تاريحي قوعامىنىڭ (راتق) وكىلدىگى اشىلدى، دەپ حابارلايدى "ادىرنا" ۇلتتىق پورتالى تاسس اگەنتتىگىنە سىلتەمە جاساپ.
بۇل تۋرالى "ەۋرازيالىق مونيتورينگ" ساراپتامالىق زەرتتەۋلەر ورتالىعىنىڭ ديرەكتورى، راتق-نىڭ قازاقستانداعى وكىلى بولىپ تاعايىندالعان الىبەك تاجىباەۆ مالىمدەدى.
«استانادا راتق وكىلدىگى اشىلدى، قازىردىڭ وزىندە 2025 جىلعا ارنالعان ءىس-شارالار جوسپارىن جاساۋعا بەلسەندى كىرىستىك. جوسپاردا كونفەرەنتسيالار مەن اعارتۋشىلىق باعدارلامالار بار»، – دەگەن تاجىباەۆ.
ونىڭ ايتۋىنشا، الداعى ءىس-شارالار باعدارلاماسىن ازىرلەۋ ءۇشىن قازاقستاندىق تاريحشىلارمەن جانە قوعام قايراتكەرلەرىمەن كەلىسسوزدەر جۇرگىزىلىپ جاتقان كورىنەدى. سونىمەن قاتار جوعارى وقۋ ورىندارىمەن، مۋزەيلەرمەن جانە ارداگەرلەر ۇيىمدارىمەن ىنتىماقتاستىق ورناتۋ جوسپارلانۋدا. ونىڭ پىكىرىنشە، وكىلدىكتىڭ اشىلۋى ەكى ەل اراسىنداعى گۋمانيتارلىق بايلانىستى نىعايتۋعا سەپتىگىن تيگىزەدى.
ايتا كەتەيىك، راتق 2023 جىلى قازاقستاننىڭ ەڭ ءىرى قالاسى – الماتىدا الەكساندر نەۆسكي ەسىمىمەن اتالعان شىركەۋدىڭ الدىنا وسى كنيازدىڭ ەسكەرتكىشىن ورناتقان. اتالعان ەسكەرتكىشتىڭ اشىلۋىنا سول كەزدەگى قالا اكىمى ەربولات دوساەۆ قاتىسقان. ونىڭ بۇل ارەكەتى قوعامدا ءتۇرلى پىكىر تۋدىردى. كوپشىلىك بۇل قادامدى رەسەي ىقپالىنىڭ سيمۆوليكالىق كورىنىسى رەتىندە باعالاپ، الەۋمەتتىك جەلىلەردە نارازىلىق ءبىلدىردى.
رەسەي اسكەري-تاريحي قوعامى 2012 جىلى رەسەي پرەزيدەنتى ۆلاديمير ءپۋتيننىڭ جارلىعىمەن قايتا قۇرىلعان. قوعامنىڭ توراعاسى – رەسەي پرەزيدەنتىنىڭ كومەكشىسى ۆلاديمير مەدينسكي. ول 2023 جىلى نەۆسكيدىڭ الماتىداعى ەسكەرتكىشىنىڭ اشىلۋىنا قاتىسقان. مەدينسكي تاياۋدا تۇركيادا بولعان ۋكراينامەن كەلىسسوزگە رەسەي دەلەگاتسياسىن باستاپ اپارعان.
ءبىر كەزدە رەسەي سىرتقىىستەرمينى سەرگەي لاۆروۆتىڭ ورتاق تاريح تۋرالى ايتقانى قازاقستان قوعامىندا قاتتى سىنالعان.
