2024-2025 وقۋ جىلىندا اقمولا وبلىسىندا ءبىلىم بەرۋ سالاسىندا ينفراقۇرىلىمدىق سەرپىلىس بايقالدى. «جايلى مەكتەپ» ۇلتتىق جوباسى اياسىندا وڭىردە 9 جاڭا مەكتەپ ىسكە قوسىلدى. بۇل قادام تىعىزدالعان مەكتەپتەر ماسەلەسىن شەشىپ، وقۋشىلار ءۇشىن قولايلى جاعداي جاساۋعا ىقپال ەتتى. بۇل تۋرالى وبلىستىق ءبىلىم باسقارماسىنىڭ باسشىسى ايناگۇل بالتاشەۆا بريفينگتە ءمالىم ەتتى، دەپ حابارلايدى وڭىرلىك كوممۋنيكاتسيالار قىزمەتىنەن.
سپيكەردىڭ ايتۋىنشا تسەلينوگراد اۋدانىندا بيىل ورىن تاپشىلىعى 8 ەسەگە، ال كوكشەتاۋ قالاسىندا ءبىر جارىم ەسەگە قىسقاردى. سونىمەن قاتار، بۇلاندى اۋىلىنداعى اپاتتى مەكتەپتىڭ ماسەلەسى شەشىلدى.
جاڭا وقۋ جىلىندا تاعى 5 مەكتەپ اشىلادى دەپ جوسپارلانۋدا. بۇل جوبالار وڭىردەگى ساپالى بىلىمگە قولجەتىمدىلىكتى ارتتىرا تۇسەدى.
«الەۋمەتتىك جاعىنان وسال توپتارعا ەرەكشە كوڭىل بولىنۋدە. بيىل وبلىستاعى 65 مىڭنان استام وقۋشى تەگىن ىستىق تاماقپەن قامتىلدى. ولاردىڭ ىشىندە باستاۋىش سىنىپ وقۋشىلارى مەن حالىقتىڭ الەۋمەتتىك وسال توپتارىنا جاتاتىن 5-11 سىنىپ وقۋشىلارى بار. جازعى دەمالىسقا ارنالعان جولدامالارعا 121,5 ميلليون تەڭگە قاراجات ءبولىندى»، دەدى ءبىلىم باسقاراسىنىڭ باسشىسى.جاز مەزگىلىندە بالالاردىڭ 93 پايىزى دەمالىسپەن، ال 100 پايىزى ءتۇرلى جۇمىستارمەن قامتىلماق. وبلىستا 16 لاگەر جۇمىس ىستەيدى، ونىڭ ىشىندە 9 – مەملەكەتتىك جانە 7 – جەكەمەنشىك. سونىمەن قاتار 208 كۇندىزگى لاگەر مەن 350 بەيىندىك الاڭ اشىلىپ، 70 مىڭنان استام وقۋشىنى قامتۋ جوسپارلانعان. تاريح، ولكەتانۋ، اسكەري-پاتريوتتىق باعىتتاعى شاتىرلى جانە كيىز ءۇي لاگەرلەرى دە ۇيىمداستىرىلادى.
«كاسىپتىك ءبىلىم بەرۋ سالاسىندا دا ايتارلىقتاي ىلگەرىلەۋ بار. وبلىستاعى 29 كوللەدجدە 19 مىڭنان استام ستۋدەنت ءبىلىم السا، ونىڭ 6 مىڭنان استامى بيىل وقۋىن اياقتايدى. 543 ستۋدەنت ۇزدىك ديپلومعا ۇمىتكەر. جىل بويى «One School – One Skill» جانە «اۆتوبۋس پروفەسسي» جوبالارى جۇزەگە استى. سينگاپۋر ەلىندە پەداگوگتەرگە ارنالعان تاعىلىمدامالار وتكىزىلدى.»، دەپ تولىقتىردى سپيكەر.ايتا كەتۋ كەرەك، بيىلعى كورسەتكىشتەر مەن جەتىستىكتەر – ءبىلىم بەرۋ جۇيەسىنىڭ ساپالى جۇمىسى مەن دامۋىنىڭ ايقىن بەلگىسى. وبلىس اكىمدىگى مەن ءبىلىم باسقارماسى الداعى ۋاقىتتا دا بۇل ءۇردىستى جالعاستىرىپ، بالالار مەن ۇستازدارعا قولايلى جاعداي جاساۋعا كۇش سالاتىندارىن جەتكىزدى.
