بىلتىر شىلدە ايىندا قازا تاپقان 22 جاستاعى اقنار گۇلستاننىڭ اناسى گۇلستان قاميت پوليتسيا تاراپىنان قىسىم كورىپ جاتقانىن مالىمدەدى، دەپ حابارلايدى «ادىرنا» ءتىلشىسى.
ايتۋىنشا، وعان استانانىڭ الماتى اۋداندىق پوليتسيا ءبولىمىنىڭ قىزمەتكەرلەرى حابارلاسىپ، ۇيىنە پوليتسەيلەردى جىبەرەتىنىن ايتىپ، قانداي دا ءبىر بەينەجازبانى بەرۋدى تالاپ ەتكەن.
مارقۇمنىڭ اناسى بارلىق ۆيدەونى بەرگەنىن ايتىپ، ءوزىن مازالاماۋدى سۇراعان. بىراق پوليتسيا قىزمەتكەرلەرى قوڭىراۋ شالۋىن توقتاتپاعان.
«ماعان ءوزىن استانا قالاسى الماتى اۋداندىق پوليتسيا باسقارماسىنىڭ تەرگەۋ ءبولىمىنىڭ قىزمەتكەرىمىن دەپ تانىستىرعان ازامات ماعان قوڭىراۋ شالىپ، مەندە جەلىدە تاراپ جۇرگەن ەكى ۆيدەونىڭ تۇپنۇسقاسى بار ەكەنىن، ولاردى مەنەن الۋعا الماتى قالالىق پوليتسيا دەپارتامەنتىنە وتىرعان ارىپتەستەرى تاپسىرما بەرىپ جاتقانىن ايتتى. مەن ول كىسىگە وقيعا بولعان كۇنى قايعىدان قان جۇتىپ، كوكىرەگىم قارس ايىرىلىپ ءجۇرىپ، تۋىسقاندارىممەن بىرگە وقيعا بولعان جەردەگى ۆيدەولاردى جانە ىسكە قاتىستى بارلىق دايەكتەردى، دالەلدەردى، فاكتىلەردى تۇگەلىمەن ادۆوكاتىم ارقىلى وتىنىشحاتپەن سول كەزدەگى بوستاندىق اۋداندىق پوليتسياسىنداعى تەرگەۋشىگە تاپسىرعانىمدى ايتتىم. تەرگەۋ امالدارى بوستاندىق اۋداندىق پوليتسياسىندا جۇرمەي، ءۇش ايعا سوزىلىپ، بۇل ءىس الماتى قالالىق پوليتسيا دەپارتامەنتىنە كەلگەننەن كەيىن دە تاعى دا سول دايەك-دالەلدەردى، ۆيدەولاردى، اۋديولاردى، بارلىق ىسكە قاتىستى ماتەريالداردى الماتى قالالىق پوليتسيا دەپارتامەنتىندەگى تەرگەۋشىنىڭ قولىنا ەكى ادۆوكات ارقىلى وتىنىشحاتپەن تاپسىرعانىمدى جەتكىزدىم. قالاي تۇسىندىرسەم دە، ماعان قايتا-قايتا باسقارمادان قوڭىراۋلار كەلە بەردى»،—دەيدى گۇلستان قاميت.
ول قازىرگى تاڭدا وزىنەن نە تالاپ ەتىپ وتىرعانىن تۇسىنبەيتىنىن جەتكىزدى. مارقۇمنىڭ اناسى قىزىنىڭ ىسىمەن اينالىسىپ جاتقان قۇقىق قورعاۋ ورگاندارىنىڭ قىزمەتكەرلەرىنەن ءىستى ءادىل، وبەكتيۆتى جۇرگىزۋدى سۇراپ، زاڭسىز قىسىم جاساماۋدى ءوتىندى.
ەسكە سالايىق، بۇعان دەيىن الماتى قالالىق پوليتسيا دەپارتامەنتى بۇل وقيعا بويىنشا قىلمىستىق ءىس قوزعالىپ، جان-جاقتى تەرگەۋ امالدارى جۇرگىزىلىپ جاتقانىن مالىمدەگەن ەدى.
<View this post on Instagram
