نەپالدىق شەرپا كامي ريتا 27 مامىردا ەۆەرەست تاۋىنىڭ شىڭىنا 31 رەت شىعىپ، الەمدەگى ەڭ كوپ رەت ەۆەرەستكە شىققان ادام رەتىندە رەكورد ورناتتى. بۇل تۋرالى Reuters اگەنتتىگى جازدى، دەپ حابارلايدى “ادىرنا”.
كامي ريتا 55 جاستا. ول نەپالدىڭ سولۋحۋمبۋ اۋدانىنداعى تامە اۋىلىندا ومىرگە كەلگەن. 1992 جىلدان بەرى الپينيستىك گيد بولىپ كەلەدى ءارى 1994 جىلدان باستاپ ەۆەرەست شىڭىنا شىققان.
وسى ۋاقىت ارالىعىندا ول تەك ءۇش جىل عانا تاۋعا شىقپاعان ەكەن. بيىل كامي ريتا قۇزار بيىككە تاڭعى 4:00-تە كوتەرىلىپ، ەۆەرەستتىڭ 8 848,86 مەتر بيىكتىگىنە جەتكەن. الپينيست 22 ادامنان تۇراتىن ءۇندى ارمياسىنىڭ ەكسپەديتسياسىن جانە 27 شەرپا توبىن باسقارعان. كامي ريتا بۇل جەتىستىكپەن وزىنە ءتان الەمدىك رەكوردتى جاڭارتتى.
بۇرىنعى رەكورد يەلەرى قاتارىندا پاسانگ داۆا شەرپا بار، ول ەۆەرەستكە 29 رەت شىققان. سونداي-اق، بريتاندىق الپينيست كەنتون كۋل — شەرپا ەمەس الپينيستەر اراسىندا رەكورد يەسى، ول 19 رەت شىڭعا شىققان. 2025 جىلعى كوتەرىلۋ ماۋسىمىندا نەپال ۇكىمەتى 468 ادامعا ەۆەرەستكە كوتەرىلۋ رۇقساتىن بەرگەن. بۇل ماۋسىمدا 300-دەن استام ادام شىڭعا جەتكەنىمەن، وكىنىشكە قاراي، ەكى ادام قايتىس بولعان. كامي ريتا الەۋمەتتىك جەلىلەردە ءوزىنىڭ ەكسپەديتسيالارى تۋرالى ءجيى اقپارات تاراتادى.
ول ەۆەرەستكە شىعار الدىندا وتكىزىلەتىن ءداستۇرلى پۋدجا راسىمىنەن فوتوسۋرەتتەر مەن ۆيدەولار جاريالايدى. بۇل رەكورد كامي ريتانىڭ جانە نەپالدىق شەرپالاردىڭ الەمدىك الپينيزم تاريحىنداعى ۇلكەن جەتىستىگى بولىپ سانالادى. ول نەپالدىڭ الپينيستىك ءداستۇرىن جانە مادەنيەتىن بۇكىل الەمگە تانىتىپ وتىر.
