مەملەكەت باسشىسى قاسىم-جومارت توقاەۆتىڭ اۋىل حالقىنىڭ ءومىر ءسۇرۋ ساپاسىن ارتتىرۋ جانە ەلدى مەكەندەردى گازداندىرۋ جونىندەگى تاپسىرمالارىن ىسكە اسىرۋ اياسىندا شۇبار اۋىلىندا تابيعي گازبەن جابدىقتاۋ جۇيەسىنىڭ ىسكە قوسىلۋ ءراسىمى ءوتتى.
شاراعا اقمولا وبلىسىنىڭ اكىمى مارات احمەتجانوۆ پەن «QazaqGaz» ۇلتتىق كومپانياسى» اق باسقارما توراعاسى سانجار جاركەشوۆ قاتىستى.
ۇزىندىعى 74,2 شاقىرىمدى قۇرايتىن گاز قۇبىرى جوباسىن تسەلينوگراد اۋدانىنىڭ قۇرىلىس ءبولىمى جۇزەگە اسىردى. ناتيجەسىندە، شۇبار اۋىلىنداعى 400-دەن استام تۇرعىن ءۇي تابيعي گازعا قوسىلدى. اۋىل تۇرعىندارىنىڭ پىكىرىنشە، جاڭا دەڭگەيدەگى جايلى جاعداي ايماقتىڭ الەۋمەتتىك-ەكونوميكالىق دامۋىنا سەرپىن بەرمەك.
«مەملەكەت باسشىسى العا قويعان باستى مىندەت – حالىقتىڭ تۇرمىس ساپاسىن جاقسارتۋ. بۇگىن ءبىز اۋىل تۇرعىندارىن تابيعي گازبەن قامتاماسىز ەتىپ وتىرمىز. بۇل – جۇيەلى جۇمىسىمىزدىڭ ناقتى ناتيجەسى. بيىلعى جىلى وبلىس كولەمىندە 12 گازداندىرۋ جوباسى جۇزەگە اسىرىلۋدا، ولاردىڭ يگىلىگىن 125 مىڭعا جۋىق ادام كورەدى»، – دەدى اقمولا وبلىسىنىڭ اكىمى مارات احمەتجانوۆ.تابيعي گازعا العاشقىلاردىڭ ءبىرى بولىپ نۇربولات پەن ايگەرىم بيسەنباەۆتار جانۇياسىنىڭ شاڭىراعى قوسىلدى. ولار ءوڭىر باسشىلىعىنا جانە ۇلتتىق كومپانياعا كوپتەن كۇتكەن جوبانى جۇزەگە اسىرعانى ءۇشىن العىسىن ءبىلدىردى:
«ءبىزدىڭ وتباسىمىز ءۇشىن بۇل – تاريحي وقيعا. ەندى وتىن جيناپ، كومىر تاسۋدىڭ قاجەتى جوق. ءۇيىمىز جىلى ءارى جايلى، ال بۇل – كەز كەلگەن وتباسى ءۇشىن ەڭ ماڭىزدىسى»،- دەپ تىلگە تيەك ەتتى جاس وتباسى.ءوز كەزەگىندە «QazaqGaz» ۇلتتىق كومپانياسى» اق باسقارما توراعاسى سانجار جاركەشوۆ گازعا قوسىلۋ – تۇرعىنداردىڭ ءومىر ءسۇرۋ جاعدايلارىن جاقسارتۋمەن قاتار، الەۋمەتتىك-ەكونوميكالىق دامۋدىڭ دا نەگىزى ەكەنىن اتاپ ءوتتى.
«QazaqGaz» ۇلتتىق كومپانياسى ەلىمىزدىڭ ءار وڭىرىندە جوعارى ءومىر ءسۇرۋ ستاندارتتارىن قامتاماسىز ەتۋ ءۇشىن تۇراقتى تۇردە جۇمىس جۇرگىزىپ كەلەدى. بۇل – حالىقتىڭ ءال-اۋقاتى مەن ەكونوميكانىڭ ورنىقتى وسۋىنە باعىتتالعان ماڭىزدى قادام»، – دەدى سانجار جاركەشوۆ.2024–2028 جىلدارعا ارنالعان ينۆەستيتسيالىق باعدارلاما اياسىندا «QazaqGaz Aimaq» اق-نىڭ ەلوردالىق وندىرىستىك فيليالى بىرقاتار ەلدى مەكەندەردە گاز قۇبىرلارىن سالۋ جۇمىستارىن قارقىندى جۇرگىزىپ جاتىر. اتاپ ايتقاندا، 2025 جىلعى اقپاندا تسەلينوگراد اۋدانىنىڭ نۇرلى اۋىلىندا دا تۇرعىندار تابيعي گازعا قول جەتكىزدى. ايتا كەتەيىك، 2020–2024 جىلدار ارالىعىندا اقمولا وبلىسىندا 657 شاقىرىم گاز قۇبىرى سالىنىپ، پايدالانۋعا بەرىلدى. ناتيجەسىندە 9 656 ءۇي گازبەن قامتىلدى. سوڭعى ءىرى جوبالاردىڭ قاتارىندا – ارشالى اۋدانىنىڭ جىبەك جولى اۋىلىن گازداندىرۋ جانە «سارىارقا» ماگيسترالدى گاز قۇبىرىنىڭ ءبىرىنشى كەزەڭى اياسىندا 17 ەلدى مەكەندى قامتۋ جۇمىستارى بار. جاقىن ارادا ەلوردا ماڭىنداعى اۋىلداردى (اققايىڭ، قوياندى، ى.التىنسارين، قاراوتكەل، تالاپكەر) مەن قوسشى قالاسى گازبەن قامتاماسىز ەتىلەدى. وسى جوبالار ناتيجەسىندە 32 975 ابونەنتكە نەمەسە شامامەن 140 مىڭ تۇرعىنعا تابيعي گاز قولجەتىمدى بولادى. الەۋمەتتىك وسال توپتارعا تابيعي گازعا قوسىلۋعا 100 اەك-كە دەيىن ماتەريالدىق كومەك كورسەتىلەدى.
