ەكس-ءماجىلىس دەپۋتاتى نۇرلان نىعماتۋليننىڭ ۇلى نۇرجان نۇرلانوۆقا قاتىستى قىلمىستىق ءىس بويىنشا حالىقارالىق تەرگەۋ تاپسىرماسى جولداندى. بۇل تۋرالى قارجىلىق مونيتورينگ اگەنتتىگى توراعاسىنىڭ ورىنباسارى جەڭىس ەلەشوۆ مالىمدەدى، دەپ حابارلايدى "ادىرنا" ۇلتتىق پورتالى.
«الماتى قالاسى بويىنشا ەكونوميكالىق تەرگەۋ دەپارتامەنتىندە رەيدەرلىك فاكتىسى بويىنشا قىلمىستىق ءىس جۇرگىزىلىپ جاتىر. حالىقارالىق تەرگەۋ تاپسىرماسى جولداندى. قازىرگى ۋاقىتتا ەشكىمگە كۇدىكتى رەتىندە پروتسەسسۋالدىق مارتەبە بەرىلگەن جوق. بىرقاتار ءمان-جايلار انىقتالۋى كەرەك. ءبىز قازىر ونى كۇدىكتى رەتىندە ەمەس، كۋاگەر رەتىندە تەرگەيمىز. باسقا دا فاكتىلەردەن كەيىن عانا قۇقىقتىق باعا بەرىلۋى مۇمكىن. مەنىڭ بىلۋىمشە، ول قازىر ەل اۋماعىنان تىس جەردە»، – دەدى ەلەشوۆ.
نۇرجان نۇرلانوۆ 2022 جىلعى قاڭتار وقيعالارىنا دەيىن، ناقتىراق ايتقاندا، 2019 جىلدىڭ اقپان ايىنان باستاپ «قازمۇنايگاز-اەرو» جشس-ءنىڭ باس ديرەكتورى قىزمەتىن اتقارعان. وعان دەيىن، 2018 جىلدىڭ قاڭتارىنان باستاپ «بايتەرەك» ۇلتتىق باسقارۋشى حولدينگىنىڭ باسقارما مۇشەسى بولعان. بۇدان دا بۇرىن ول كۆازيمەملەكەتتىك سەكتوردا بىرنەشە «ماڭىزدى» لاۋازىمدار اتقارعان.
نۇرلان نىعماتۋلين ماجىلىستەگى قىزمەتىنەن 2022 جىلعى 1 اقپاندا قاڭتار وقيعالارىنان كەيىن كەتتى. ول 2016 جىلدان باستاپ تومەنگى پالاتا سپيكەرى بولعان، بۇل ونىڭ ەكىنشى رەت توراعالىق ەتۋى ەدى.
العاش رەت 2012-2014 جىلدارى ءماجىلىس توراعاسى بولعان. بۇعان دەيىن ول پرەزيدەنت اكىمشىلىگىن باسقارعان جانە قاراعاندى وبلىسىنىڭ اكىمى قىزمەتىن اتقارعان.
نۇرلان نىعماتۋليننىڭ ەگىز باۋىرى ەرلان نىعماتۋلين دە ءماجىلىس پەن سەناتتا دەپۋتات بولعان.
ال ولاردىڭ ۇلكەن اعاسى ارعىن نىعماتۋلين قاراعاندى وبلىستىق ءماسليحاتىنىڭ بۇرىنعى دەپۋتاتى.
نىعماتۋليندەرگە بۇعان دەيىن دە بىرنەشە رەت رەيدەرلىك ارەكەتتەرگە، قىلمىستىق قۇرىلىمدارعا قاتىسى بار دەگەن ايىپتار تاعىلعان. سونداي-اق قىلمىستىق ىستەردى قولدان ۇيىمداستىردى دەگەن دە كۇدىك بولعان.
الايدا وسى ۋاقىتقا دەيىن اعايىندى نىعماتۋليندەر بوستاندىقتا ءجۇر.
