Eks-mäjılıs deputaty Nūrlan Nyǧmatulinnıŋ ūly Nūrjan Nūrlanovqa qatysty qylmystyq ıs boiynşa halyqaralyq tergeu tapsyrmasy joldandy. Būl turaly Qarjylyq monitoring agenttıgı töraǧasynyŋ orynbasary Jeŋıs Eleşov mälımdedı, dep habarlaidy "Adyrna" ūlttyq portaly.
«Almaty qalasy boiynşa ekonomikalyq tergeu departamentınde reiderlık faktısı boiynşa qylmystyq ıs jürgızılıp jatyr. Halyqaralyq tergeu tapsyrmasy joldandy. Qazırgı uaqytta eşkımge küdıktı retınde prosessualdyq märtebe berılgen joq. Bırqatar män-jailar anyqtaluy kerek. Bız qazır ony küdıktı retınde emes, kuäger retınde tergeimız. Basqa da faktılerden keiın ǧana qūqyqtyq baǧa berıluı mümkın. Menıŋ bıluımşe, ol qazır el aumaǧynan tys jerde», – dedı Eleşov.
Nūrjan Nūrlanov 2022 jylǧy Qaŋtar oqiǧalaryna deiın, naqtyraq aitqanda, 2019 jyldyŋ aqpan aiynan bastap «QazMūnaiGaz-Aero» JŞS-nıŋ bas direktory qyzmetın atqarǧan. Oǧan deiın, 2018 jyldyŋ qaŋtarynan bastap «Bäiterek» ūlttyq basqaruşy holdingınıŋ basqarma müşesı bolǧan. Būdan da būryn ol kvazimemlekettık sektorda bırneşe «maŋyzdy» lauazymdar atqarǧan.
Nūrlan Nyǧmatulin mäjılıstegı qyzmetınen 2022 jylǧy 1 aqpanda Qaŋtar oqiǧalarynan keiın kettı. Ol 2016 jyldan bastap tömengı palata spikerı bolǧan, būl onyŋ ekınşı ret töraǧalyq etuı edı.
Alǧaş ret 2012-2014 jyldary mäjılıs töraǧasy bolǧan. Būǧan deiın ol Prezident äkımşılıgın basqarǧan jäne Qaraǧandy oblysynyŋ äkımı qyzmetın atqarǧan.
Nūrlan Nyǧmatulinnıŋ egız bauyry Erlan Nyǧmatulin de mäjılıs pen senatta deputat bolǧan.
Al olardyŋ ülken aǧasy Arǧyn Nyǧmatulin Qaraǧandy oblystyq mäslihatynyŋ būrynǧy deputaty.
Nyǧmatulinderge būǧan deiın de bırneşe ret reiderlık äreketterge, qylmystyq qūrylymdarǧa qatysy bar degen aiyptar taǧylǧan. Sondai-aq qylmystyq ısterdı qoldan ūiymdastyrdy degen de küdık bolǧan.
Alaida osy uaqytqa deiın aǧaiyndy Nyǧmatulinder bostandyqta jür.
