ماسكەۋ اۋەجايلارىندا دروندار شابۋىلىنان كەيىن 60-تان استام رەيس توقتاتىلدى، دەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
روساۆياتسيانىڭ دەرەگىنشە، درونداردىڭ شابۋىلىنا بايلانىستى كەمىندە 62 رەيس توقتاتىلىپ، تاعى 52 رەيس ەكى ساعاتتان استام ۋاقىتقا كەشىكتىرىلگەن.
ۆەدومستۆو ساعات 10:00-گە دەيىنگى دەرەكتەرگە سۇيەنە وتىرىپ، ماسكەۋگە باعىت العان 55 ۇشاقتىڭ رەزەرۆتىك اەرودرومدارعا بۇرىلعانىن ايتتى.
“كەشىكتىرىلگەن جانە توقتاتىلعان رەيستەردىڭ جولاۋشىلارىمەن اۋەكومپانيالار مەن اۋەجايلاردىڭ ماماندارى جۇمىس جۇرگىزۋدە”، – دەلىنگەن مالىمدەمەدە.
اۋەجايلاردا جولاۋشىلار كوپ جينالىپ قالعان. تىركەۋ جانە كىرۋ جولدارىندا ۇزىن-سونار كەزەك بايقالادى.
ۋكرايناعا قارسى سوعىستى جالعاستىرىپ جاتقان رەسەيدە وتكەن تۇندە درونداردىڭ اۋقىمدى شابۋىلى تىركەلدى. رەسەي قورعانىس مينيسترلىگى ۋكراينانىڭ ۇشاق ءتيپتى 296 درونىنىڭ ماسكەۋ، بريانسك، بەلگورود، ۆلاديمير، ۆورونەج، يۆانوۆو، كالۋگا، كۋرسك، ورەل، ريازان، سمولەنسك، تۆەر جانە تۋلا وبلىستارىنىڭ ۇستىنەن ۇشىپ كەلە جاتقاندا اۋادا جويىلعانىن مالىمدەدى.
ماسكەۋ مەرى سەرگەي سوبيانين رەسەيلىك اسكەريلەر ەلورداعا باعىتتالعان 33 دروندى اتىپ تۇسىرگەنىن حابارلادى.
