الماتىدا تەرەزەدەن قۇلاپ قازا تاپقان اقنار گۇلستاننىڭ ىسىنە قاتىستى جاڭا اقپارات تارادى. 29 مامىردا وتكەن ءباسپاسوز جيىنىندا ادۆوكات ينگا يمانباي مەن مارقۇمنىڭ اناسى قىلمىستىڭ الدىن الا جوسپارلانىپ، قاساقانا جاسالعانىن دالەلدەيتىن تىڭ ماتەريالدار ۇسىندى، دەپ حابارلايدى “ادىرنا” ۇلتتىق پورتالى.
“بۇل ءىستى قولعا العالى قىلمىستىڭ ءتۇرلى تۇستارى اشىلىپ جاتىر. اقنارعا قاتىستى قىلمىس بولعان كۇنى ەكى قىزدىڭ جانىندا سىبايلاسى بولعانى، ەكى قىزدىڭ ىسكە قاتىسى بارى قازىر انىقتالىپ جاتىر. 2024 جىلدىڭ 12 ساۋىرىندە قۇربىسى ديدار اقناردى بىرگە تاماقتانۋعا شاقىرعان. ەكەۋى بىرگە تاماقتانىپ بولعان سوڭ ديدار ءبىزدىڭ ۇيگە قونا سال، جالعىزبىن دەپ ايتادى. اقنار قۇربىسىنىڭ ۇيىنە بارعان كەزدە ۇلباق ەسىمدى جىگىت جۇرگەنىن كورەدى. سول جەردە ۇلباق مارقۇمعا زورلىقتان تىس جىنىستىق سيپاتتاعى ارەكەت جاسايدى”، – دەيدى ادۆوكات.
وقيعا ۆيدەوعا تۇسىرىلگەن. كادرلاردان ەر ادامنىڭ اقناردى تەرەزەنى اشىپ، اقنارگە سەكىرىپ كەتدەپ ايتقانىن كورۋگە بولادى. ۆيدەونى اقناردى تاماقتانۋعا شاقىرعان ديدار ەسىمدى قۇربىسى تۇسىرگەن. ەندى ادۆوكات ۆيدەونى تەرگەۋ ورگاندارىنا بەرىپ، بىرقاتار قىلمىستىق باپتار بويىنشا ساراپتاما جۇرگىزۋدى سۇراماق.
ءوتىنىشحات مىنا باپتار بويىنشا جىبەرىلمەك:
- باس بوستاندىعىنان زاڭسىز ايىرۋ;
- سەكسۋالدىق سيپاتتاعى زورلىق-زومبىلىق ارەكەتتەرى;
- ءوزىن-ءوزى ولتىرۋگە يتەرمەلەۋ;
- ار-نامىسى مەن قادىر-قاسيەتىن قورلاۋ;
- ءوز بەتىمەن ارەكەت ەتۋ – بوتەن ادامنىڭ جەكە زاتتارىن زاڭسىز يەمدەنۋ.
ينگا يمانبايدىڭ سوزىنشە، اقنار ۆيدەوداعى ادامدى مۇلدە تانىمايدى. قىز پاتەردەن قاشىپ شىقپاق بولعانىمەن، ەر ادام ونى جىبەرمەي قويعان.
“ونىڭ ار-نامىسىن قورلاپ، بالاعات سوزدەر ايتىپ، جەكە زاتتارى، تەلەفونى مەن سومكەسىن الىپ قويعان. قىزعا پسيحولوگيالىق قىسىم جاساۋ ءۇشىن "سەكىر" دەپ، تەرەزەنى اشقان. ۆيدەودا ونىڭ كەتكىسى كەلگەنى كورىنەدى. مۇنىڭ ءبارىن ۇسىنىلعان ۆيدەودان انىق بايقاۋعا بولادى. بەلگىلى بولعانداي، تۇنگى ساعات ۇشتە ول قىزداردىڭ ادۆوكاتى بولعان، بۇل سۇراق تۋعىزادى", – دەدى ادۆوكات ينگا يمانباي.
ءباسپاسوز جيىنىندا اقناردىڭ اناسى مەن زاڭگەرى بۇل قىلمىستىڭ الدىن الا جوسپارلانىپ، ادەيى جاسالعانىن ايعاقتايتىن ماتەريالداردى ۇسىندى. سونداي-اق ۆيدەودا كورىنگەن ەر ادامنىڭ وسى ىسكە قاتىسى، ەكى كۇدىكتى قىزبەن بىرلەسىپ ارەكەت ەتۋى مۇمكىن دەگەن بولجام بار.
