بۇگىن، 2 ماۋسىمدا تالدىقورعاندا ءوتىپ جاتقان شەرزات پولاتتىڭ ىسىنە قاتىستى سوت وتىرىسىندا پروكۋرور دانا سارسەنباي سوتتان ايىپتالۋشىلاردى 1,6 جىلدان 23 جىلعا دەيىن باس بوستاندىعىنان ايىرۋدى سۇرادى، دەپ حابارلايدى «ادىرنا» ءتىلشىسى.
اتاپ ايتساق، ابزال شىناسىلدى قىلمىستىق كودەكستىڭ 293-بابى 3-بولىگى (بۇزاقىلىق), 99-بابى 2-بولىگى 5,9 جانە 14-تارماعى (ادام ءولتىرۋ), 24-بابى 3-بولىگى – 99-بابى 2-بولىگى 1,7 جانە 9-تارماعىندا (ادام ولتىرۋگە وقتالۋ) كورسەتىلگەن قىلمىستى جاساعانى ءۇشىن كىنالى دەپ تانىپ، 23 جىلعا باس بوستاندىعىنان ايىرۋدى;
راۆيل ساكيەۆتى قلمىستىق كودەكستىڭ 293-بابى 3-بولىگى (بۇزاقىلىق), 24-بابى 3-بولىگى – 99-بابى 2-بولىگى 7 جانە 9-تارماعىندا (ادام ولتىرۋگە وقتالۋ) بويىنشا 20 جىلعا باس بوستاندىعىنان ايىرۋدى;
شىڭعىس بەلعوجاەۆتى، دارحان اسكەنتايدى، ديدار قالياحمەتتى، نۇربول توقتاۋباەۆتىقىلمىستىق كودەكستىڭ 293-بابى 3-بولىگى (بۇزاقىلىق) بويىنشا كىنالى دەپ تانىپ، 7 جىلعا باس بوستاندىعىنان ايىرۋدى;
ازامات توقتاۋباەۆتى قىلمىستىق كودەكستىڭ 293-بابى 3-بولىگى (بۇزاقىلىق), 188-بابى 1-بولىگى (ۇرلىق) بويىنشا 15 جىلعا باس بوستاندىعىنان ايىرۋدى;
نۇرقياس ءىلياسوۆتى قىلمىستىق كودەكستىڭ 293-بابى 3-بولىگى (بۇزاقىلىق) بويىنشا 9 جىلعا باس بوستاندىعىنان ايىرۋدى;
دۋمان ىسقاقتى (2007 جىلى تۋعان) قىلمىستىق كودەكسىنىڭ 434-بابى (قىلمىستى جاسىرۋ) كىنالى دەپ تانىپ، 1 جىل 6 ايعا باس بوستاندىعىنان ايىرۋدى سۇرادى.
پروكۋرور جابىرلەنۋشى تاراپتىڭ ءىستى «توپتاسىپ ادام ءولتىرۋ» بابىنا قايتا سارالاۋ تۋرالى وتىنىشىنە قاتىستى دا پىكىر ءبىلدىردى.
«قانشالىقتى اۋىر ءارى ەموتسيالىق ءىس بولسا دا، مەن تەك زاڭ اياسىندا ارەكەت ەتۋگە مىندەتتىمىن. اركىم تەك ءوزى جاساعان قىلمىسى ءۇشىن عانا جاۋاپ بەرۋى كەرەك. سوندىقتان جابىرلەنۋشىلەردىڭ باسقا ايىپتالۋشىلارعا دا «ادام ءولتىرۋ» ايىبىن تاعۋ تۋرالى ءوتىنىشىن قولداۋعا وبەكتيۆتى نەگىز بولعان جوق»، – دەدى ول.
