بۇگىن اقمولا وبلىسىندا حالىقارالىق ناشاقورلىقپەن جانە ەسىرتكىنىڭ زاڭسىز اينالىمىمەن كۇرەس كۇنىنە ورايلاستىرىلعان ەسىرتكىگە قارسى ايلىق رەسمي تۇردە باستالدى. بۇل تۋرالى اقمولا وبلىسىنىڭ وڭىرلىك كوممۋنيكاتسيالار قىزمەتى الاڭىندا وتكەن بريفينگتە ايتىلدى.
شارادا ءسوز سويلەگەن اقمولا وبلىستىق پسيحيكالىق دەنساۋلىق ورتالىعىنىڭ باس دارىگەرى ناشاقورلىقتىڭ مەديتسينالىق جانە الەۋمەتتىك سالدارلارىن اتاپ ءوتتى. ونىڭ ايتۋىنشا، ەسىرتكىگە تاۋەلدىلىك – تەك دەنساۋلىققا قاۋىپ ءتوندىرىپ قانا قويماي، وتباسىلار مەن قوعامعا دا ەلەۋلى زيان كەلتىرەتىن كۇردەلى ماسەلە.
«2024 جىلدىڭ قورىتىندىسى بويىنشا وبلىستا 413 ادام «ناركومانيا» دياگنوزىمەن ديسپانسەرلىك ەسەپتە تۇر. بۇل كورسەتكىش وتكەن جىلمەن سالىستىرعاندا شامامەن 2,4%-عا ازايدى. الايدا جاسوسپىرىمدەر اراسىنداعى جاعداي الاڭداتارلىق: بيىل ەكى ءجاسوسپىرىمنىڭ ەسىرتكىگە تاۋەلدىلىگى انىقتالدى»، – دەدى ول.سونىمەن قاتار، العاش رەت تىركەلگەن ەسىرتكىگە تاۋەلدىلەردىڭ سانى 2024 جىلى 56 ادامعا جەتىپ، وتكەن جىلمەن سالىستىرعاندا 33%-عا ارتقان. ەسىرتكىگە تاۋەلدىلەردىڭ باسىم بولىگى جازاسىن وتەۋ مەكەمەلەرىندە وتىرعاندار. بۇعان سەبەپ سوتتالعان ازاماتتاردى مەديتسينالىق قامتاماسىز ەتۋ مىندەتى 2023 جىلدان باستاپ دەنساۋلىق ساقتاۋ مينيسترلىگىنە جۇكتەلۋى.
«سوڭعى جىلدارى سينتەتيكالىق ەسىرتكىلەرگە تاۋەلدى ادامدار سانى ارتتى. بۇرىن مۇنداي جاعدايلار تىركەلمەگەن بولسا، بۇگىندە بۇل اسا وزەكتى پروبلەماعا اينالىپ وتىر»، – دەپ اتاپ ءوتتى سپيكەر.ال اقمولا وبلىسى پد ەسىرتكى قىلمىستارىنا قارسى ءىس-قيمىل باسقارماسىنىڭ باستىعى، پوليتسيا پولكوۆنيگى دانيار سابىرجانوۆ ايماقتاعى ناركوكريمينوگەندىك جاعداي تۋرالى باياندادى.
«2025 جىلدىڭ باسىنان بەرى وبلىستا 136 ناركوقۇقىقبۇزۋشىلىق تىركەلدى. ونىڭ ىشىندە 56 دەرەك – ەسىرتكىنى وتكىزۋگە، 3 دەرەك – ەسىرتكى قۇرالدارىن زاڭسىز جارنامالاۋعا قاتىستى. سونىمەن قاتار، اسا ءىرى كولەمدە ساقتاۋ فاكتىسى جانە 72 قىلمىستىق تەرىس قىلىق تىركەلدى»، – دەدى پولكوۆنيك.پوليتسەيلەر 2024 جىلمەن سالىستىرعاندا ەسىرتكى زاتتارىن كوبىرەك تاركىلەگەن. اتاپ ايتقاندا، 2025 جىلى زاڭسىز اينالىمنان 88 كگ-دان استام ەسىرتكى تاركىلەنگەن (وتكەن جىلى – 77 كگ). ونىڭ ىشىندە 6,8 كگ سينتەتيكالىق ەسىرتكى، 5,7 كگ گاشيش جانە 7,6 كگ ماريحۋانا بار. سابىرجانوۆتىڭ ايتۋىنشا، بيىلعى جىل ءىىم باستاماسىمەن «قۇقىقبۇزۋشىلىقتاردىڭ الدىن الۋ جىلى» دەپ جاريالانىپ، ايماقتا اۋقىمدى پروفيلاكتيكالىق جۇمىستار قولعا الىنعان.
«ماۋسىم ايىندا وبلىس بويىنشا 100-دەن استام پروفيلاكتيكالىق ءىس-شارا وتكىزۋ جوسپارلانعان. ماقسات جاستاردى ەسىرتكىدەن ساقتاندىرۋ، ساۋ ءومىر سالتىن ناسيحاتتاۋ جانە قوعامدا تەرىس كوزقاراس قالىپتاستىرۋ»، – دەدى ول.بريفينگ سوڭىندا سپيكەرلەر بارلىق ازاماتتاردى بەلسەندىلىك تانىتۋعا، جاستارعا ۇلگى بولىپ، سالاۋاتتى ءومىر سالتىن ۇستانۋعا شاقىردى.
